لامپیدوسا د مدیترانې سمندر د کډوالۍ په لاره کې یو له اصلي تمځایونو څخه پاتې شوی، چیرې چې اروپا ته د سفر پر مهال د کښتیو د ډوبیدو یا په اوبو کې د بند پاتې کیدو له امله وخت ناوخته خونړۍ پېښې رامنځته کیږي.
د ایټالیا د ANSA خبري اژانس د چهارشنبې په ورځ راپور ورکړ چې د ایټالیا د لامپیدوسا ټاپو ته نږدې په مدیترانې سمندر کې د یوې وړې کښتۍ د ډوبیدو له امله ۱۹ تنو ناقانونه کډوالو ژوند د لاسه ورکړی او څو نور په نازک حالت کې دي.
د یاد اژانس په حواله، د ایټالیا ساحلي ساتونکو ویلي چې بیړنیو خدماتو په کښتۍ کې ۱۹ جسدونه او ۵ نور کډوال چې روغتیايي حالت یې خورا خراب و، موندلي دي. همدارنګه ۵۸ نور کسان ژغورل شوي دي.
د ژغورنې دا عملیات د سهار په لومړنیو ساعتونو کې له لامپیدوسا څخه د ۸۵ سمندري میله لیرې پیل شول. د ساحلي ساتونکو یوې ګزمې کښتۍ د پېښې ځای ته ځان ورساوه او په نازک حالت کې ژوندي پاتې شوي کسان یې د بېړنۍ درملنې لپاره ټاپو ته انتقال کړل.
تر اوسه د مړینې دقیق لامل او شرایط نه دي روښانه شوي. که څه هم، ANSA راپور ورکړی چې دې کډوالو څو ورځې وړاندې د لیبیا له ساحل څخه د اروپا په لور حرکت کړی و.
لامپیدوسا له اوږدې مودې راهیسې د هغو کډوالو لپاره چې غواړي له افریقا څخه د مدیترانې له لارې اروپا ته لاړ شي، د ننوتلو یو مهم مرکز دی. په دې لاره کې ډیری وخت د کښتیو د ډوبیدو یا په سمندر کې د بند پاتې کیدو له امله د خلکو د مړینې خبرونه ورکول کیږي.
