په شمالي ایرلینډ کې د مهاجرینو پر خلاف پيل شوې مظاهرې او پاڅون دوام لري.
په شمالي ایرلینډ کې د تیرو ۳ ورځو راهیسې د بالیمینا او شاوخوا سیمو کې د مهاجرینو پر خلاف مظاهرې او شدت دوام لري. ویل کیږي بلوهګرو پر پولیسو بریدونه وکړل، موټرونه یې وسوځول او د کډوالو ټولنې یې په نښه کړې.
دا ګډوډي هغه مهال پیل شوه کله چې دوه ځوان هلکان د یوې ادعا شوې جنسي تېري په تړاو ونیول شول. د دې پېښې له امله تاوتریخوالی ورځ تر بلې زیات شو.
مظاهره کوونکو پر پولیسو د پټرولو بمونو، خښتو او اورلوبو له لارې دوامداره بریدونه کوي، چې په پایله کې یې په بالیمینا او شاوخوا سیمو کې له ۳۰ زیات پولیس ټپیان شوي دي. موټرونه ویجاړ شوي، کډوالې کورنۍ له خپلو کورونو شړل شوي او کاروبارونه د نورو بریدونو له وېرې تړل شوي دي.
په همدې حال کې، په لارنې کې ماسک لرونکو ځوانانو د لارنې تفریحي مرکز په نښه کړ. د ودانۍ کړکۍ ماتې کړې او دننه يي اور ورته کړ. په ټولنیزو رسنیو کې مخکې داسې ناسم راپورونه خپاره شوي وو چې ګواکې له بالیمینا څخه بېځایه شوي کډوال په دې مرکز کې ځای پر ځای شوي وو. ویل شوي چې د برید پر مهال په ودانۍ کې څوک نه وو.
د کډوالو ټولنې، په ځانګړې توګه د فیلیپین او ختیځې اروپا خلک، د ګواښونو، ویجاړیو او بېځایه کېدو راپورونه ورکړي دي. ځینو کورنیو خپل کورونه تړلي یا ملي بیرغونه یې پرې ځوړولي دي ترڅو بریدګر وډار کړي. یوه فیلیپیني کورنۍ هغه مهال په خپل کور کې بند پاتې شوه کله چې د دوی موټر وسوځول شو.
دا ګډوډي د خلکو د غوسې له امله پیل شوه، کله چې دوه ځوان ۱۴ کلن هلکان د جون په ۷مه د بالیمینا په کلوناون ټیرس سیمه کې د یوې نجلۍ د جنسي تېري په تور ونیول شول. سره له دې چې پولیسو تایید کړې چې نیول شوي کسان ځایي دي، خو په انټرنیټ کې خپره شوې ناسم معلوماتو د نژادي تاوتریخوالي اور بل کړی دی.
د پولیسو مرستیال مشر رایان هینډرسن په یوه خبري غونډه کې وویل چې چارواکي لا هم د دې تاوتریخوالي د څرنګوالي ارزونه کوي. هغه وویل: “تر دې دمه موږ ته یا د استخباراتو له لارې دا روښانه نه ده چې آیا دې پېښو کې د کومې پارا نظامي ډلې لاس دی او که نه .” هغه هغو پټو ډلو ته اشاره وکړه چې لا هم په هېواد کې فعالې دي او د کاتولیک ملتپالو او پروتستانت اتحادپالو ترمنځ د تېرې شخړې تل پاتې اغېزې لري.
پولیس اوس د څارنې ویډیوګانې ګوري او د بریتانیا له ځواکونو څخه د اضافي ملاتړ په اړه غور کوي. تاوتریخوالی له بالیمینا څخه نورو ښارونو لکه نیوټاون ابې، کاریکفرګس او کولرین ته هم غځېدلی، چېرته چې د بلوهګرو د کنټرول لپاره ځانګړي تدابیر نیول شوي دي.
د شمالي آیرلنډ لومړۍ وزیرې میشل اونیل او مرستیالې وزیرې اما لېټل-پینګلي په ګډه دا بریدونه وغندل او دا یې “تنظیم شوې نژادي غندنه” وبلله. د بریتانیا لومړي وزیر کیر سټارمر هم د ارامۍ او د عدالت له بهیر څخه د ملاتړ غوښتنه وکړه.
اعلان شوی چې د شمالي آیرلینډ وزیر هیليري بین پلان لري چې بالیمینا ته سفر وکړي او د وضعیت له نږدې ارزونه وکړي.
د ټولنې ډلې او مدني مشران هڅه کوي چې بېځایه شوې کورنۍ ملاتړ وکړي او کړکېچ کم کړي، ځکه چې سیمه لا هم په بېثباتۍ کې ده.
