په افغانستان کې د ملګرو ملتونو مرستندویه پلاوي (یوناما) د سې شنبې په ورځ  د چاودنې نه  خبر ورکړ، خو د چاودنې د لامل په اړه یې نور جزیات نه دي ورکړي.

په افغانستان کې د بشري حقونو لپاره د ملګرو ملتونو ځانګړي راپور ورکوونکي، ریچارډ بینیټ، تر دې وړاندې د کابل په لوېدیځ، دشت برچي سیمه کې دا "ناوړه برید" وغانده. دا سیمه د تاریخي پلوه د ځورول شوې شیعه هزاره ټولنې استوګنځی دی.

د یوناما په وینا، د دوشنبې ورځې د چاودنې قربانیان د ۹ او ۱۴ کلونو ترمنځ عمرونه لري.

د یوناما یوه ویاند فرانس پرس خبري اژانس (AFP) ته ویلي: "یوناما لا تر اوسه د چاودنې شرایط نه دي تایید کړي." هغه د متضادو راپورونو یادونه وکړه چې ګواکې دا یو برید و او یا هم د ناچاوده توکو چاودنه وه.

د څو لسیزو جګړو له امله افغانستان د جګړې له پاتې شویو چاودېدونکو توکو ډک پاتې شوی. د ملګرو ملتونو د ارقامو له مخې، دا هېواد په نړیواله کچه په دې برخه کې د تلفاتو دریمه لوړه کچه لري.

د افغانستان د ماین پاکۍ د همغږۍ ریاست، چې د پېښې ځای یې څېړلی، ویلي چې د دوشنبې په ماسپښین په دغه ښوونځي کې یو لاسي بم چاودلی دی. دا جزیات د کابل د پولیسو له خوا د ورکړل شویو معلوماتو سره ورته دي.

یوناما ویلي: "زموږ فکر له ټپي شویو ماشومانو او د هغوی له کورنیو سره دی. موږ د دې پېښې د څرنګوالي د معلومولو لپاره د څېړنو غوښتنه کوو. ښوونځي او تعلیمي مرکزونه باید خوندي وساتل شي."

دغه شخصي لومړني ښوونځي په خپله فېسبوک پاڼه کې یو پیغام خپور کړی او له خلکو یې غوښتي چې "د ټپیانو لپاره دعا وکړي"، خو نور جزیات یې نه دي ورکړي.

یوې ۳۸ کلنې مېرمنې چې د پېښې ځای ته نږدې اوسیږي، فرانس پرس ته ویلي چې چاودنه په هغه وخت کې وشوه چې ماشومان له ښوونځي رخصت شوي وو. هغې د امنیتي دلایلو له امله د خپل نوم نه ښودلو په شرط وویل: "ټپیان دومره ډېر وو چې ما یې حساب نه شوای کولی."

د طالبانو د حکومت په تېرو کلونو کې په کابل کې وخت ناوخته بریدونه شوي، چې په هغې کې د تېرې جنوري میاشتې په یوه مرکزي چینایي رستورانت کې چاودنه هم شامله وه چې لږ تر لږه اووه کسان پکې ووژل شول.

په دشت برچي سیمه کې تر دې وړاندې هم ګڼې خونړۍ چاودنې شوې دي، په شمول د ۲۰۲۱ کال د نجونو د یوه ښوونځي مخې ته د موټر بم چاودنه چې لږ تر لږه ۹۰ کسان پکې ووژل شول او په سلګونو نور ټپیان شول.

اسلامي دولت ډلې (داعش) په دشت برچي کې د ډېریو هغو بریدونو مسؤلیت منلی چې شیعه ګان یې په نښه کړي دي.