د حوثیانو تر کنټرول لاندې محکمې د جاسوسۍ په تور پر ۱۷ کسانو د اعدام حکم صادر کړ

دا حکم د یمن په هغو سیمو کې چې د حوثیانو تر کنټرول لاندې دي، د دوی د ځپونکو اقداماتو په لړ کې تر ټولو وروستی دی.

د سبا خبري اژانس د راپور له مخې، د یمن په پلازمېنه  صنعا کې د حوثیانو تر کنټرول لاندې یوې محکمې ۱۷ کسان بهرنیو دولتونو ته د جاسوسۍ په تور مجرم بللي او د مرګ سزا یې ورته اورولې ده.

په صنعا کې ځانګړې جنايي محکمې - چې د یمن پلازمېنه او د دغې ډلې تر کنټرول لاندې ده - د شنبې په ورځ دا حکم صادر کړ.

محکمې ویلي، چې دغه محکوم شوي کسان د "یوې جاسوسي شبکې دننه د جاسوسۍ د حجرو" برخه وو چې له څو هېوادونو سره یې تړاو درلود، او په عام محضر کې یې د ډزو په واسطه د اعدام سزا صادره کړه.

محکمې همدارنګه یو سړی او یوه ښځه په لس کاله بند محکوم کړل، په داسې حال کې چې یو بل تورن کس ته برائت ورکړل شو.

د ځینو محکومو تورنو کسانو استازي وکیل عبدالباسط غازي وویل، چې د شنبې د ورځې پر پرېکړې استیناف غوښتنه کېدای شي.

سبا خبري اژانس راپور ورکړی چې پر تورنو کسانو تور لګول شوی و چې "د ۲۰۲۴-۲۰۲۵ کلونو په موده کې یې له هغو بهرنیو هېوادونو سره جاسوسي کړې چې له یمن سره د دښمنۍ په حالت کې دي."

سرچینې زیاته کړې، څارنوالانو ویلي چې تورنو کسانو د بېلابېلو هېوادونو له استخباراتي افسرانو سره همکاري کړې وه، چې په کې بریتانیا، متحده ایالات، او د نورو ترڅنګ د اسرائیل استخباراتي اداره موساد هم شامل دي.

د خبري اژانس د معلوماتو له مخې، تورنو کسانو "دښمنانو ته د دولتي مشرانو د لسګونو ځایونو او تګ راتګ، او همدارنګه د توغندیو په اړه معلومات ورکړي وو، چې له امله یې ګڼ شمېر پوځي، امنیتي او ملکي ځایونه په نښه شول او په پایله کې یې لسګونه کسان ووژل شول او زیربناوې په پراخه کچه ویجاړې شوې."