د روسیې او اوکراین د جګړې له پیل څخه تر دوه کلونو زیات وخت تېر شوی، او د تیر کال په اګست کې کیف زرګونه سرتیري د روسیې د کورسک سیمې پر لور واستول. خو د روسیې وروستیو بریدونو د اوکرایني ځواکونو ډېره برخه له کورسک څخه شاته تمبولې ده.
د روسیې ولسمشر ولادیمیر پوتین څو ځله وړاندیز کړی چې د روسیې ځواکونه دې د سرحد په اوږدو کې د خوندیتوب یوه سیمه جوړه کړي.
د روسیې د دفاع وزارت ویلي چې د باسیوکا کلی، چې د سودژا سرحد ته نږدې دی، نیول شوی او د سومي په سیمه کې یې په ۱۲ نورو ځایونو کې د اوکرایني ځواکونو پر وړاندې بریدونه کړي دي.
دغه وزارت زیاته کړې چې روسیې د اوکرایني ځواکونو په وړاندې د ګورنال، ګویوو، او اولیشنیا په روسي کلیو کې بریا ترلاسه کړې ده.
د جګړې د وضعیت په اړه د پرو-اوکرایني ډیپ سټېټ نقشه ښيي چې اوکراین اوس مهال د روسیې د شاوخوا ۶۳ کیلومتره مربع (۲۴ مربع میله) سیمې کنټرول لري، چې دا شمېره د تیر کال د کیف د ادعا شوې ۱۴۰۰ کیلومتره مربع سیمې په پرتله ډېره کمه شوې ده.
ډیپ سټېټ د سرحد په اوږدو کې د ۸۱ کیلومتره مربع سیمې - چې باسیوکا هم پکې شامل دی - وضعیت د "نامعلوم کنټرول" په توګه یاد کړی دی.
اوس مهال روسیه د اوکراین د شاوخوا پنځمې برخې کنټرول لري، چې پکې کریمیا هم شامله ده. روسیې کریمیا په ۲۰۱۴ کال کې ضمیمه کړې وه. سربېره پر دې، روسیه د څلورو نورو سیمو ډېره برخه کنټرولوي، چې مسکو یې اوس د روسیې برخه ګڼي، خو دا ادعا د ډېرو هېوادونو لخوا نه ده منل شوې.
د روسیې د اټکلونو له مخې، روسیه د کریمیا ټول کنټرول لري، د لوګانسک نږدې ټولې سیمې، او د دونیڅک، زاپورېژیا او خرسون د سیمو له ۷۰ سلنې څخه زیات کنټرول لري. همدارنګه د خارکیف د سیمې یوه کوچنۍ برخه هم د روسیې تر کنټرول لاندې ده.
