دفاع وزارت وايي، دغه دوه کسان "د نظم او قانون په جدي سرغړونو شکمن دي."

چین ویلي، چې د خپل ځواکمن مرکزي پوځي کمیسیون (CMC) جګپوړی مرستیال مشر او یو بل لوړپوړی چارواکی "د نظم د جدي سرغړونو"، چې معمولاً د فساد لپاره کارول کېدونکې اصطلاح ده، په شک تر پلټنو لاندې دي.

د شنبې ورځې دا اعلان د هغه پراخ کمپاین تر ټولو نوې هڅه ده، چې له یوې لسیزې څخه ډېر وخت مخکې د ولسمشر شي جین پینګ واک ته له رسېدو راهیسې د ګوند او دولت په ټولو کچو کې د فساد د ریښو ایستلو لپاره پیل شوی دی.

د دفاع وزارت په یوه بیانیه کې ویلي: "له یوې ارزونې وروسته... پرېکړه شوې چې د ژانګ یوشیا او ليو ژینلي په اړه پلټنې پیل شي."

وزارت ویلي، دغه دوه کسان "د نظم او قانون په جدي سرغړونو شکمن دي."

ژانګ یوشیا، ۷۵ کلن، د مرکزي پوځي کمیسیون (CMC) د دوو مرستیال مشرانو له ډلې ډېر جګپوړی جنرال دی.

هغه دا لقب له ژانګ شینګمین سره شریکوي، چې د بېجینګ د پټو توغندیو ځواکونو جنرال دی او له هغه سره کومه خپلوي نه لري.

ژانګ شینګمین د تیر اکتوبر په میاشت کې وروسته له هغه دې چوکۍ ته ترفیع وکړه چې بېجینګ یې مخکینی مشر د فساد ضد په یوه بل پراخ کمپاین کې له دندې ګوښه کړ.

دواړه جنرالان له شي څخه ټیټه رتبه لري، چې له ۲۰۱۲ کال راهیسې د مرکزي پوځي کمیسیون مشري پر غاړه لري.

ليو، ۶۱ کلن، د مرکزي پوځي کمیسیون د ګډو ځواکونو لوی درستیز دی.