د سیمې والي الکساندر ګوسوف وايي چې په برید کې لسګونه کسان ټپیان شوي او زیاتوي چې په سیمه کې د توغندیز ګواښ خبرداری لیرې شوی دی.

د سیمې والي الکساندر ګوسوف ویلي دي چې د روسیې په ورونژ ښار باندې د اوکراین په یو توغندیز برید کې لږ تر لږه پنځه کسان وژل شوي دي.

ګوسوف د دوشنبې په ورځ په ټیلیګرام کې په یوه بیان کې وویل چې په دې برید کې په لسګونو نور کسان ټپیان شوي او د ښار د یوې تصدۍ صنعتي تاسیساتو ته زیان رسیدلی دی. هغه زیاته کړه چې د څو اپارتماني ودانیو مخکني برخې او کړکۍ او همدارنګه ګڼ شمیر وسایط هم زیانمن شوي دي.

والي د وژل شویو کسانو له کورنیو سره خپله خواخوږي څرګنده کړه او ټپیانو ته یې د ژر تر ژره روغتیا هیله وکړه. هغه دا هم اعلان وکړ چې په سیمه کې د توغندیز ګواښ خبرداری لیرې شوی او خبرداری یې ورکړ چې د پیښې له ځایه عکسونه یا ویډیوګانې په انټرنیټ کې خپرې نه کړي، په ځانګړې توګه هغه چې موقعیتونه افشا کولی شي.

د روسیې د هوايي چلند چارواکو وویل چې د اوکراین د هوايي برید له امله د تاتارستان سیمې په بوګولما، کازان، نیژنیکامسک او چبوکساري هوايي ډګرونو کې پر الوتنو لنډمهاله محدودیتونه لګول شوي دي.

بریدونه په شدت سره دوام لري

د اوکراین لوی درستیز  ویلي چې ځواکونو یې د روسیې پر ګڼو پوځي او زیربنايي اهدافو بریدونه کړي، چې پکې د مسکو په سیمه کې د فضايي اړیکو یو مرکز، د بې پیلوټه الوتکو (ډرون) د چلونکو د روزنې مرکزونه او لوژستیکي زیربنا شامل دي.

هغه دا هم وویل چې اوکرایني ځواکونو د روسیې تر کنټرول لاندې سیمو کې د قوماندې مرکزونه او نور پوځي سنګرونه او د روسیې په کراسنودار سیمه کې د قفقاز  بندر زیربناوې په نښه کړې دي.

بلخوا، د روسیې دفاع وزارت ویلي چې د دوی د هوايي دفاع سیسټمونو په تیرو ۲۴ ساعتونو کې ۱۲ لارښود شوي هوايي بمونه او ۷۳۴ اوکرایني بې پیلوټه الوتکې راغورځولې دي. وزارت زیاته کړه چې روسي ځواکونو هغه ځایونه په نښه کړي چې د اوکرایني لیرې واټن ویشتونکو بې پیلوټه الوتکو د راټولولو او ساتلو لپاره کارول کیدل او سرتیري یې د ختیځ اوکراین د کستیانتینیوکا (Kostiantynivka) ښارګوټي په شمول په څو سیمو کې خپلو هجومي عملیاتو ته دوام ورکوي.

اوکراین او روسیه په منظمه توګه د یو بل پر خاوره د بریدونو راپورونه ورکوي، خو د زیانونو او تلفاتو پر جزیاتو او دقیقو شمیرو تل د یو بل ادعاوې ردوي.