د ایران سپاه پاسداران وايي چې د هېواد په مرکزي برخو کې یې د "دښمن الوتکې" نسکورې کړي چې د دوی په وینا د ژغورنې په یوه ناکامه هڅه کې بوختې وې.
وال سټریټ ژورنال د یکشنبې په ورځ د امریکایي پوځي ارقامو په حواله راپور ورکړ، هغه الوتکې چې متحده ایالاتو په ایران کې د ژغورنې د ماموریت پرمهال کارولې او وروسته ویجاړې شوې، هره یوه یې تر ۱۰۰ ملیون ډالرو ډېره بیه لري.
د راپور له مخې، MC-130J ډوله الوتکې د یوې راغورځول شوې F-15E جنګي الوتکې د عملې د غړو د موندلو په عملیاتو کې کارول شوې وې، چې په ترڅ کې یې د عملې دویم غړی په بریالیتوب سره وژغورل شو.
د امریکا د هوايي ځواک د ځانګړو عملیاتو د قوماندې په وینا، MC-130J الوتکې په دښمنانه چاپیریال کې د سرتېرو د کوزولو او بېرته ایستلو لپاره ډیزاین شوې دي او په هوا کې د تېلو د اخیستلو (تیل اچولو) وړتیا هم لري. دا الوتکه د دفاعي پرمختللو سیستمونو لکه سینسرونو سره مجهزه ده، ترڅو د هوايي دفاعي ګواښونو لکه د حرارت تعقیبونکو توغندیو مخه ونیسي.
یو امریکایي چارواکي ویلي چې امریکا د ژغورنې د ماموریت پرمهال خپلې دوه MC-130J الوتکې پخپله ویجاړې کړې دي، خو دا یې ونه ویل چې الوتکې څنګه له منځه لاړې.
خو د ایران سپاه پاسداران د یکشنبې په ورځ په یوه خبرپاڼه کې ویلي چې د دوی ځواکونو هغه "دښمن الوتونکي شیان" ویجاړ کړي چې د دوی په وینا د ژغورنې د یوې ناکامې هڅې لپاره د هېواد مرکزي برخو ته داخل شوي وو. د ایراني چارواکو له خوا خپاره شوي انځورونه د لږ تر لږه د یوې الوتکې پاتې شونې (ملبه) ښيي.
د ایران د پارلمان مشر محمد باقر قالیباف په خپله یوه ټولنیزه پاڼه کې لیکلي: "که امریکا همداسې درې نورې 'بریاوې' ترلاسه کړي، نو په بشپړه توګه به تباه شي."
ایراني چارواکو دا ادعا هم کړې چې د امریکا د ژغورنې د عملیاتو پرمهال نورې الوتکې، لکه چورلکې او یوه بار وړونکې الوتکه هم ویجاړې شوې دي، خو دا ادعاوې تر اوسه د کومې خپلواکې سرچینې له خوا نه دي تایید شوې.
د امریکا ځانګړو ځواکونو د شنبې په ورځ د هغې F-15 جنګي الوتکې د عملې دویم غړی وژغوره چې د ایران پر سر راغورځول شوې وه. دغه ژغورنه په سویل لوېدیځ ایران کې د ۳۶ ساعتونو کړکېچنو عملیاتو وروسته ترسره شوه، چېرته چې ویل کېدل امریکایي ځواکونو او د ایران سپاه پاسداران دواړو هڅه کوله ورک شوي امریکایي افسر ته تر بل وړاندې ځان ورسوي.
