په وینزویلا کې د تیرو ۱۲۶ کلونو تر ټولو قوي زلزله رامنځته شوه چې د ژغورنې پراخو هڅو" ته اړتیا لري.، دا خبره د ملګرو ملتونو د مرستو مشر ټام فلیچر کړې ده.
په وینزویلا کې له ویجاړونکو غبرګو زلزلو یوه ورځ وروسته، د لا ګوایرا په ساحلي ښار کې خلکو لا هم په خپلو لاسونو خاورې اړولې ترڅو خپل ګاونډیان وژغوري. کارلوس بورجیس، چې د کانکریټي سلیبونو د لرې کولو لپاره د درنو ماشینونو (لکه بلدوزرونو) پر نشتوالي یې خپګان څرګند کړ، وویل: "موږ په خپله وسه مرسته کوو، خو د وسایلو کمښت له ستونزو سره مخ کړي یو."
د هغه ټیم له یوې ودانۍ څخه درې کسان راوویستل، په داسې حال کې چې د کورنیو نورو اندېښمنو غړو، په شمول د یوې مور چې تنکی ځوان زوی یې لادرکه و، د پنجشنبې په سهار د پېښې په ځای کې انتظار کاوه.
د امریکا د جیولوژیکي سروې ادارې اټکل کړی چې د وینزویلا په دوو ځواکمنو زلزلو کې چې پلازمېنه کاراکاس او شاوخوا سیمې ولړزولې، د مړو شمیر ښايي له ۱۰،۰۰۰ څخه زیات شي. خو د سرپرستې ولسمشرې ډیلسي روډریګز حکومت تر اوسه د لږترلږه ۲۳۵ کسانو مړینه او د ۱۵۲۰ کسانو ټپي کېدل تایید کړي دي.
د لا ګوایرا اوسیدونکي، چې د هیواد تر ټولو زیانمن شوی ښار دی، او د مورون اوسیدونکي، چې د زلزلې مرکز ته نږدې دی، د محدودو رسمي مرستو په منځ کې په خپله هڅې کوي. ارګینیس مارتینز، چې په خاورو کې د خپل یو خپلوان په لټه کې و، وویل: "آیا دا ممکنه نه ده چې اردو راوبلل شي؟ هرڅوک راشئ او مرسته وکړئ. دوی په زغره والو موټرو کې راولئ چې له خلکو سره مرسته وکړي. هر چیرته چې ټراکټورونه وي، پیدا یې کړئ."
سره له دې چې د کورني ګاز خدمتونه پرې شوي وو، خو بیا هم ځینې کنډوالو د شپې لخوا اور اخیستی و. وېریدلي اوسېدونکي، چې ډیری یې د تللو ځای نه درلود، په کوڅو کې راټول شوي وو او په ویجاړو شویو ودانیو کې یې د ژوندي پاتې شویو کسانو لټون کاوه.
حکومت، چې ویلي یې دي ۲۵۰ ودانۍ زیانمنې یا ویجاړې شوې دي، اعلان وکړ چې له هسپانیې، متحده ایالاتو، مکسیکو او قطر څخه مرستې په لاره دي. حکومت همدارنګه له خصوصي سکتور څخه وغوښتل چې د ژغورنې په هڅو کې د مرستې لپاره درانه ماشینونه په پور ورکړي.
د رویټرز شاهدانو ولیدل چې د "کالیکټیوو" (حکومت پلوه موټرسایکل سپاره) ډلو غړي هم په ځینو ځایونو کې د ژغورنې په چارو کې مرسته کوي. ۵۰ کلنې سهیل سرکوز، چې خپل کور او دنده یې له لاسه ورکړې، وویل: "زما ودانۍ اوس د اوسېدو نه ده او هیڅ نه لرم. یوازې زه یم او زما زوی، او په دې هیواد کې بله کورنۍ نه لرم."
چور او تالان
د لا ګوایرا په ځینو سیمو کې خلکو د خوړو او اوبو په لټه کې وو او د رویټرز ټیم لږترلږه په دوو پلورنځیو کې د چور او تالان شاهد و. د ښار د "جوز ماریا وارګاس" روغتون له ټپیانو ډک و او ځینې ناروغان په بهر کې تداوي کېدل. ۶۰ کلنې بېټریز روډریګز وویل: "دا یوه غمیزه ده." د هغې د وراره پښې په زلزله کې تر فشار لاندې راغلې وې او پرې شوې، او یو بل ۶ کلن وراره یې مړ شوی و.
د وسله والو ځواکونو قوماندانۍ په یوه خبرپاڼه کې ویلي چې دوی لا ګوایرا ته صحرایي روغتونونه استوي ترڅو عاجل عملیات ترسره کړي. په نورو ځایونو کې هم روغتونونه له ستونزو سره مخ دي. په مورون کې ډاکټر اګسټو رامیرز وویل چې دوی د لومړنیو طبي توکو لکه د وینې فشار مانیټرونو، بنداژ، دستکشو او درد وژونکو درملو له سخت کمښت سره مخ دي.
د ژغورنې د هڅو ورووالی
د ژغورنې چارې په خورا ورو سرعت روانې دي. په لا ګوایرا کې اوسیدونکو په بې وسۍ سره د یوې وړې نجلۍ چیغې اورېدې چې د ساعتونو لپاره یې د مرستې غوښتنه کوله، خو له بده مرغه مخکې له دې چې څوک یې وژغوري، نجلۍ ساه ورکړه. د ښار په یو بل ځای کې د دریو کسانو غږونه د ویجاړې شوې ودانۍ له کنډوالو اورېدل کېدل، خو ځايي خلکو ویل چې د وسایلو د نشتوالي له امله د هغوی لپاره هیڅ نه شي کولی.
د "ډومینګو لوسیاني" روغتون یو ډاکټر د نوم نه ښودلو په شرط وویل چې ماشومان یوازې په امبولانسونو کې روغتون ته راوړل کیږي؛ ځینې یې خپل نومونه اخلي او ځینې یې یوازې د پیژندنې پټې پر لاسونو لري.
