"د امریکا مرکزي قوماندانۍ (سنتکام) تایید کړه چې یوه KC-135 الوتکه په عراق کې راغورځېدلې، په داسې حال کې چې دویمه الوتکه په خوندي ډول ناسته کړې ده.
د امریکا د پوځ په وینا، د امریکا یوه KC-135 ډوله الوتکه د عراق په لوېدیځ کې غورځېدلې او په دې پېښه کې شامله بله الوتکه په خوندي ډول ځمکې ته کښته شوې ده.
سنتکام، چې په منځني ختیځ کې د امریکایي ځواکونو مسؤلیت پر غاړه لري، په خپله اعلامیه کې ویلي: «یوه الوتکه د عراق په لوېدیځ کې راغورځېدلې او دویمه په خوندي ډول ناسته کړې ده. دا پېښه د دښمن د برید یا خپلمنځي ډزو له امله نه ده رامنځته شوې.»
دا لږ تر لږه څلورمه امریکایي نظامي الوتکه ده چې د ایران پر وړاندې د جګړې پر مهال له منځه ځي؛ له دې وړاندې په کویټ کې درې F-15 الوتکې په تېروتنې سره د خپلمنځي ډزو په پایله کې ویشتل شوې وې.
د امریکا د هوايي ځواک د معلوماتو له مخې، KC-135 الوتکې چې له ۶۰ کلونو راهیسې په فعالیت بوختې دي، معمولاً درې کسیزه عمله لري: پیلوټ، مرستیال پیلوټ او درېیم کس چې د تېلو د لېږد پایپ کنټرولوي ترڅو نورو الوتکو ته تېل ورسوي. خو د هوايي ځواک په حقایق کې راغلي چې د KC-135 ځینې ماموریتونه لارښود ته هم اړتیا لري او دا الوتکه تر ۳۷ پورې مسافر لېږدولی شي.
د جګړې په پیل کې، چې د فبرورۍ په ۲۸مه پیل شوه، کویټي ځواکونو په تېروتنې سره درې امریکایي F-15E جنګي الوتکې وغورځولې، خو د سنتکام په وینا، ټول شپږ واړه عمله وتوانېدل چې په پراشوټ کې ځانونه وژغوري .
نظامي قوماندانۍ هغه مهال ویلي وو چې دغه پېښه د جګړې په ترڅ کې رامنځته شوې وه، چې په کې د ایران د الوتکو، بالستیک توغندیو او ډرون بریدونه شامل وو."
