د اسرائیلو د اپوزیسیون مشر "یائیر ګولان" د لومړي وزیر بنیامین نتانیاهو حکومت د "یهودي ترهګرۍ" په هڅولو تورن کړ او ویې ویل چې د نتانیاهو سیاستونو په اشغال شوې لویدیځه غاړه کې تاوتریخوالی زیات کړی دی.
د اسرائیلو د اپوزیسیون مشر یائیر ګولان وویل چې د نتانیاهو د "غیر مسؤلانه" سیاستونو بیه اسرائیلي سرتېري پرې کوي. دا څرګندونې په اشغال شوې لویدیځه غاړه کې نابلس ښار ته نږدې پر "تل" ښارګوټي باندې د پوځ تر ملاتړ لاندې د نامشروع مېشتو یهودانو له برید دوه ورځې وروسته کېږي.

د ډیموکرات ګوند مشر ګولان پر خپله ایکس (X) پاڼه په یوه خپره کړې ویډیو کې ویلي چې د نتانیاهو سیاستونه، په ځانګړې توګه د افراطي ارتوډوکس یهودانو له نظامي خدمت څخه معافیت او هغه څه چې ده "یهودي ترهګري" وبلله، پر اسرائیلي سرتېرو دروند بار اچولی دی. هغه وویل: "د نتانیاهو-سموټریچ-بن غفیر حکومت په اشغال شوې لویدیځه غاړه کې اسرائیلي سرتېري یوازې پرېښي دي."

ګولان نتانیاهو ته په خطاب کې وویل: "نتانیاهو! موږ په ټاکنو کې ستا د ځایناستي کېدو لپاره راځو."

نوموړي تېره شنبه هم خبرداری ورکړی و چې د نتانیاهو حکومت لویدیځه غاړه د "باروتو په یوې بوشکې" بدله کړې چې د اسرائیلو امنیت ګواښي.
ګولان وویل چې د نتانیاهو، سموټریچ او بن غفیر حکومت په قصدي ډول په لویدیځه غاړه کې یو "چاودیدونکی واقعیت" رامنځته کړی دی. هغه زیاته کړه چې افراطي مېشتو یهودانو له میاشتو راهیسې په سیستماتیک ډول ترینګلتیاوې زیاتې کړي او پوځ او هېواد یې یوې پراخې جګړې ته راکش کړي دي.

د تېرې جمعې په ورځ، د پوځ په ملاتړ نامشروع مېشتو یهودانو د فلسطین "تل" ښارګوټي باندې برید وکړ چې ۴ فلسطینیان یې ووژل. د فلسطیني او اسرائیلي سرچینو په وینا، په دغه نښته کې ۲ اسرائیلیان هم وژل شوي دي.

له دې پېښې وروسته، اسرائیلي ځواکونو نابلس او شاوخوا سیمې محاصره کړې، په لویه کچه یې خلک ونیول او په ټوله لویدیځه غاړه کې یې د پراخو بریدونو لپاره د چمتووالي خبر ورکړ.

د فلسطیني رسمي احصایو له مخې، د ۲۰۲۳ کال له اکتوبر راهیسې، اسرائیلي ځواکونو او نامشروع مېشتو یهودانو په اشغال شوې لویدیځه غاړه کې لږ تر لږه ۱۱۸۲ فلسطینیان وژلي، زرګونه نور یې ټپیان کړي او شاوخوا ۲۴۰۰۰ کسان یې نیولي دي.