امریکا په وینزویلا کې د خپل سفارت د بیا پرانیستلو لپاره چمتووالی نیسي
پلان جوړونه لا تر اوسه په لومړني پړاو کې ده، او وروستۍ پریکړه نه ده شوې.
د امریکا د بهرنیو چارو وزارت یوه لوړ پوړي چارواکي انادولو اژانس ته وویل، د ټرمپ اداره په کاراکاس کې د امریکا د سفارت د بیا پرانیستلو لپاره تیاری نیسي.
چارواکي د دوشنبې په ورځ د نوم نه ښودلو په شرط وویل: «لکه څنګه چې ولسمشر ټرمپ ویلي، موږ د دې لپاره چمتووالی نیسو چې که ولسمشر دا پرېکړه وکړي، او د سفارت بیا پرانیستلو ته اجازه ورکړل شي.»
پلان جوړونه لا هم په لومړني پړاو کې ده، او تر اوسه هېڅ وروستۍ پرېکړه نه ده شوې.
کله چې وپوښتل شول چې ایا امریکا به په کاراکاس کې خپل سفارت بیا پرانیزي که نه، ټرمپ د یکشنبې په ورځ په اېر فورس ون الوتکې کې خبریالانو ته وویل: «موږ پرې فکر کوو.»
په وینزویلا کې د امریکا سفارت په ۲۰۱۹ کال کې وروسته له هغه وتړل شو چې ټرمپ مخالف سیاستوال خوان ګوایدو د ولسمشر په توګه وپېژاند او د نیکولاس مادورو د ۲۰۱۸ کال بیا ټاکنه یې نامشروع وبلله.
له هغه وخت راهیسې، په وینزویلا کې د امریکا مسؤلیتونه د ګاونډي هېواد کولمبیا د سفارت لهخوا پر مخ وړل کیږي.
دا پرمختګ وروسته له هغه کیږي چې د امریکا د شپې پوځي عملیاتو د وینزویلا ولسمشر نیکولاس مادورو د اونۍ په پای کې په کاراکاس کې وتښتاوه، چې په پایله کې یې هغه نیویارک ته ولیږدول شو، چیرې چې هغه او د هغه مېرمن، سیلیا فلوریس، د دوشنبې په ورځ د وسلو او نشهيي توکو د قاچاق په تورونو کې ځانونه بې ګناه وبلل.
