د لومړي وزیر بنیامین نتنیاهو مشرۍ د لیکود ګوند کابینې وزیرانو له پارلمان غوښتنه کړې د دې میاشتې تر پای پورې د پارلمان له رخصتۍ مخکې د اسرائیلو تر اشغال لاندې لویدیځې غاړې مځکو الحاق تصویب کړي.
دوی دغه غوښتنه د نتنیاهو او د امریکا د ولسمشر ډونالډ ټرمپ تر منځ د راتلونکې اونۍ د لیدنې مخکې کړې ده، چې تمه کېږي په دې کې به د غزې د احتمالي ۶۰ ورځني اوربند او د حماس سره د یرغملانو د خوشې کولو پر تړون خبرې وشي.
دغه غوښتنلیک د کابینې ۱۵ وزیرانو او د اسرائیلو د پارلمان (کنېسټ) مشر امیر اوهانا لاسلیک کړی دی.
د اسرائیلو د لومړي وزیر دفتر دې غوښتنې ته سملاسي ځواب نه دی ورکړی. د ستراتیژیکو چارو وزیر رون درمر، چې د نتنیاهو نږدې سلاکار ګڼل کېږي، دغه غوښتنلیک یې نه دی لاسلیک کړی. نوموړی له دوشنبې راهیسې په واشنګټن کې د ایران او غزې په اړه په خبرو بوخت دی.
په غوښتنلیک کې لیکل شوي: "موږ، وزیران او د کنېسټ غړي، غوښتنه کوو چې په یهودیه او سامره (اشغال شوې لویدیځه غاړه) کې دې سمدستي د اسرائیلو حاکمیت او قانون تطبیق شي."
په غوښتنلیک کې ویل شوي چې د ۲۰۲۳ کال د اکتوبر په ۷مه د حماس ناڅاپي برید وښوده چې د یهودي مېشت ځایونو بلاکول او د فلسطیني دولت د جوړېدو مفکوره د اسرائیلو لپاره یو وجودي ګواښ دی.
"دا دنده باید بشپړه شي، وجودي ګواښ باید له منځه یووړل شي، او د هېواد په زړه کې د بل قتل عام باید مخنیوی وشي."
د اسرائیلو اشغال:
اسرائیل په ۱۹۶۷ کال کې د عرب اسرائیلو جګړې پر مهال لویدیځه غاړه اشغال کړه.
په اشغال شوې لویدیځه غاړه کې شاوخوا ۵۰۰,۰۰۰ غیر قانوني مېشتیني او په اشغال شوي ختیځ بیت المقدس کې له ۲۰۰,۰۰۰ څخه زیات مېشتیني شتون لري. اسرائیل په اشغال شوې لویدیځه غاړه کې له ۱۰۰ څخه زیات غیر قانوني مېشت ځایونه جوړ کړي دي.
ډېری هېوادونه په اشغال شوې لویدیځه غاړه کې د غیر قانوني صهیونستي مېشت ځایونه، چې ډېر یې فلسطیني ټولنې له یو بل څخه جلا کوي، د نړیوالو قوانینو سرغړونه ګڼي.
په محاصره شوې غزه کې اسرائیل له ۲۰۲۳ کال د اکتوبر له ۷مې راهیسې تر دې دمه له ۵۶,۶۰۰ څخه زیات فلسطینیان، چې ډېری یې ښځې او ماشومان دي، وژلي دي.
د فلسطین رسمي خبري اژانس (وفا) په وینا، شاوخوا ۱۱,۰۰۰ فلسطینیان د ویجاړو شویو کورونو لاندې ښخ شوي دي.
کارپوهان بیا باور لري چې د وژل شویو کسانو اصلي شمېر د غزې چارواکو د راپورونو څخه ډېر زیات دی، او اټکل کوي چې دا شمېر ښايي شاوخوا ۲۰۰,۰۰۰ ته ورسېږي.
