طالبان له امریکا څخه د افغانستان کنګل شوو شتمنیو د خوشې کولو غوښتنه وکړه

په افغانستان کې  د طالبانو په مشرۍ لنډمهاله ادارې له امریکا څخه د افغانستان کنګل شوې بهرنۍ شتمنۍ د ازادولو غوښتنه کړې. طالبانو حکومت د لویو قدرتونو سره د "دوستانه" اړیکو جوړولو هیله څرګندوي.

د افغانستان د اقتصاد مرستیال وزیر، لطیف نظري، دغه څرګندونې د جاپان په پلازمېنه ټوکیو کې د کیوډو نیوز سره په یوه مرکه کې وکړې، چې د هغه د وروستي سفر په ترڅ کې ترسره شوه.

نظري وویل چې د طالبانو اداره "غواړي د لویو قدرتونو سره دوستانه اړیکې جوړې کړي" او وړاندیز یې وکړ چې اوس د دې وخت دی چې امریکا "مخ ته لاړه شي" او د افغانستان د بهرنۍ شتمنۍ کنګل ختم کړي، کوم چې د راپور له مخې د اقتصاد لپاره خنډ ګرځېدلی.

دغه پرمختګ وروسته له هغې رامنځته شو چې د طالبانو ادارې په جنورۍ کې درې امریکایي اتباع خوشې کړل، لږ وروسته له دې چې د امریکا ولسمشر ډونلډ ټرمپ خپله دنده پیل کړه.

تېره اوونۍ، د ټرمپ د یرغمل چارو استازي، اډم بوهلر، په افغانستان کې د لنډمهاله بهرنیو چارو وزیر مولوي امیر خان متقي سره وکتل، چې دا د واشنګټن او کابل ترمنځ لومړنۍ رسمي اړیکه وه. بوهلر سره د امریکا پخوانی ځانګړی استازی زلمی خلیلزاد هم ملګرتیا کوله.

۷ میلیارده ډالره کنګل شوې شتمنۍ

د افغانستان شاوخوا ۷ میلیارده ډالره بهرنۍ شتمنۍ د امریکا د پخوانۍ بایډن ادارې لخوا کنګل شوې وې، وروسته له هغې چې د امریکا په مشرۍ بهرني ځواکونه له جګړه ځپلي هېواد څخه په بشپړ ډول ووتل.

د افغانستان د اقتصاد مرستیال وزیر نظري د جاپان سره د اړیکو د پیاوړتیا هیله څرګنده کړه، ترڅو د افغانستان په زیربناوو او صنعت کې پرمختګ ته وده ورکړي .

نظري وویل، لنډمهاله اداره "د جاپان سره د قوي اړیکو هیله لري" او هیله یې څرګنده کړه چې د جاپان ملاتړ به د افغانانو د ژوند معیارونه ښه کړي.

مرستیال وزیر د طالبانو د لوړپوړي پلاوي برخه وه، چې د نیپون مرستندویه بنسټ په بلنه د فبرورۍ په میاشت کې جاپان ته سفر کړی وو.

دا د طالبانو د چارواکو لخوا د ۲۰۲۱ کال د واک ترلاسه کولو راهیسې لومړنی پیژندل شوی سفر و.

د سفر په ترڅ کې، د جاپان د بهرنیو چارو وزارت د منځني ختیځ د څانګې مشر د طالبانو د لنډمهاله ادارې له غړو سره غیر رسمي لیدنه وکړه.

هیڅ د ملګرو ملتونو غړی هېواد اوس مهال د طالبانو اداره په رسمیت نه پېژني.