ایران پر اذربایجان برید وکړ؛ باکو وایي د ځواب ورکولو حق لري

اذربایجان د نخجوان هوايي ډګر ته نږدې د ایران د بې پیلوټه الوتکو بریدونه وغندل، چې ملکي وګړي یې ټپیان کړي او سیمه ییزې ترینګلتیاوې یې زیاتې کړې دي.

د پنجشنبې په ورځ له ایران څخه توغول شوې بې پیلوټه الوتکې (ډرون) د اذربایجان پر نخجوان سیمې لګېدلې، چې د نخجوان نړیوال هوايي ډګر ته نږدې یې د اور لګېدنې لامل شوې دي. ویډیويي انځورونو ښودلې چې له هوايي ډګر څخه تور لوګي پورته کېږي؛ دغه هوايي ډګر د ایران له پولې څخه شاوخوا ۱۰ کیلومتره لیرې پروت دی.

د اذربایجان د بهرنیو چارو وزارت تایید کړه چې د پنجشنبې په غرمه د ایران له خاورې د بې پیلوټه الوتکو بریدونه شوي، چې یو برید د نخجوان د خودمختاره جمهوریت د هوايي ډګر پر ټرمینل او بل د "شکرباد" کلي کې یوه ښوونځي ته نږدې شوی دی.

د اذربایجان د بهرنیو چارو وزارت په یوه اعلامیه کې وویل: «موږ د ایران د اسلامي جمهوریت له خاورې ترسره شوي دغه ډرون بریدونه په کلکه غندو، چې له امله یې د هوايي ډګر ودانۍ زیانمنه شوې او دوه ملکي وګړي ټپیان شوي دي.»

باکو دا بریدونه د نړیوالو قوانینو سرغړونه وبلله چې سیمه ییزې ترینګلتیاوې زیاتوي، او له ایرانه یې د سمدستي توضیحاتو او مخنیوي اقداماتو غوښتنه وکړه. په اعلامیه کې راغلي: «موږ غوښتنه کوو چې د ایران اسلامي جمهوریت په لنډ وخت کې دا موضوع روښانه کړي، توضیحات ورکړي او په راتلونکي کې د داسې پېښو د تکرار مخنیوي لپاره لازم او عاجل اقدامات وکړي.»

باکو د غبرګون حق له ځانه سره ساتي
د اذربایجان حکومت خبرداری ورکړی چې که دا ډول بریدونه بیا تکرار شي، دوی د مناسب ځواب ورکولو حق له ځانه سره ساتي.

په همدې تړاو، په اذربایجان کې د ایران سفیر مجتبی دمیرچیلو د اذربایجان د بهرنیو چارو وزارت ته احضار شو. وزارت وویل: «ایراني لوري ته به یو کلک احتجاج څرګند شي او یو اړوند احتجاجي یادداشت به هم ورسپارل شي.»