د ټرمپ او شي له لیدنې مخکې امریکا او چین په مالیزیا کې سوداګریزې خبرې بیا پیل کړې
امریکايي چارواکی وویل غواړو دواړه خواوې یوې داسې نقطې ته ورسیږو چې یو څه ولرو چې' ولسمشر ټرمپ او د چین ولسمشر شي ته 'یې د غور لپاره وړاندې کړای شو'.

د چین او امریکا جګپوړو چارواکو د یکشنبې په ورځ په مالیزیا کې د دویمې ورځې لپاره سوداګریزې خبرې بیا پیل کړې، په داسې حال کې چې ولسمشر ډونالډ ټرمپ اسیا ته خپل درې هېوادیز سفر پیل کړ، چې په ترڅ کې به یې له ولسمشر شي جین پینګ سره وګوري.

د نړۍ د دوو لویو اقتصادونو ترمنځ د خبرو وروستي پړاوونه د شنبې په ورځ د سوېل ختیځې اسیا هېوادونو ټولنې (ASEAN) د سرمشریزې په درشل کې پیل شول، چې دغه سرمشریزه د یکشنبې په ورځ په کوالالمپور کې پرانیستل شوه.

د چینايي پلاوي مشري مرستیال لومړی وزیر هی لیفینګ او د امریکايي پلاوي مشري د خزانې وزیر سکاټ بیسینټ کوي.

دا د دواړو خواوو ترمنځ پنځمه غونډه ده. جګپوړو مرکچیانو تر دې مخکې په جینیوا، لندن، سټاکهولم او مادرید کې خبرې کړې وې.

د امریکا سوداګریز استازي جیمیسن ګرییر په کوالالمپور کې خبریالانو ته وویل چې دواړه خواوې "داسې یوې نقطې ته رسېږي چې موږ یو څه لرو چې مشرانو ته یې د غور لپاره وړاندې کړو."

د اګست په میاشت کې، امریکا او چین د نوامبر تر ۱۰مې پورې د تعرفو په برخه کې پر اوربند موافقه وکړه – دا له هغه وروسته دریم ځل دی چې ټرمپ تعرفې ۱۴۵ سلنې ته لوړې کړې او بیا یې راکمې کړې دي.

چین هم پر امریکايي توکو خپلې تعرفې تر ۱۲۵ سلنې پورې لوړې کړې وې.

ګرییر د خپلو څرګندونو په یوه ویډیو کې وویل: "موږ د اوربند د غځولو په اړه خبرې وکړې، موږ د نایابه ځمکنیو توکو په اړه خبرې وکړې، البته، موږ د هر ډول موضوعاتو په اړه خبرې وکړې. او زه فکر کوم چې موږ داسې یو ځای ته رسېږو چې مشران به په راتلونکې اونۍ کې یوه ډېره ګټوره غونډه ولري."

دواړو خواوو د شنبې په ورځ تر پنځو ساعتونو ډېرې خبرې وکړې.

ټرمپ په سوېلي کوریا کې له شي سره ګوري

ټرمپ په داسې حال کې کوالالمپور ته ورسېد چې اسیان خپله ۴۷مه سرمشریزه پیل کړه، او په دې توګه دریم امریکايي ولسمشر شو چې د سوېل ختیځې اسیا دغه هېواد ته سفر کوي.

د یوه امریکايي ولسمشر لومړنی سفر په ۱۹۶۶ کال کې د لینډن بي جانسن لخوا شوی و.

لومړي وزیر انور ابراهیم یې هرکلی وکړ او وروسته دواړه د امریکا او مالیزیا ترمنځ د غونډو او همدارنګه د سرمشریزې لپاره د کوالالمپور کنوانسیون مرکز ته لاړل.

ټرمپ د انور ترڅنګ د کمبوډیا او تایلنډ ترمنځ د سولې د تړون د لاسلیک شاهد هم و، چې د جولای په میاشت کې یې ترمنځ خونړۍ سرحدي نښتې شوې وې.

مالیزیا د یکشنبې له ورځې څخه تر سه شنبې پورې د اسیان سرمشریزې کوربه توب کوي.

د چین او امریکا د لوړپوړو سوداګریزو مرکچیانو ترمنځ دا غونډه راتلونکې اونۍ د پنجشنبې په ورځ په سوېلي کوریا کې له شي سره د ټرمپ له لیدنې مخکې ترسره کیږي، چیرې چې د نړۍ د لویو اقتصادونو مشران به د اسیا-پاسفیک اقتصادي همکاریو فورم په سرمشریزه کې ګډون وکړي.

مالیزیا ته پر لاره په "ایرفورس ون" الوتکه کې، ټرمپ خبریالانو ته وویل چې هغه او شي "ډېر څه لري چې بحث پرې وکړي."

هغه اسیا ته د سفر پر مهال، چیرې چې به مالیزیا او جاپان ته هم سفر وکړي، وویل: "هغوی باید امتیازات ورکړي. زه فکر کوم موږ به یې هم ورکړو. زموږ تعرفې پر هغوی ۱۵۷ سلنه دي. زه فکر نه کوم چې دا د هغوی لپاره د زغملو وړ وي، او هغوی غواړي چې دا کچه راټیټه کړي، او موږ له هغوی څخه ځانګړي شیان غواړو."

بلومبرګ نیوز راپور ورکړی چې د سوېلي کوریا سره د تعرفو د معاملې په اړه، ټرمپ وویل "دا نږدې ده چې وروستۍ شي."