د کابل میشته طلوع نیوز د خبر له مخې، فطرت په یوه خبري ناسته کې د پاکستان او افغانستان ترمنځ د روانو کړکیچونو او متقابلو بریدونو په اړه څرګندونې وکړې.

فطرت اعلان وکړ چې د پاکستان د بریدونو په پایله کې ۱۱۰ کسان وژل شوي او ۱۲۳ نور ټپیان شوي دي. نوموړي زیاته کړه چې په پکتیا، پکتیکا، خوست، کابل، ننګرهار، کنړ او کندهار ولایتونو کې په دغو بریدونو کې ۳۵۰ کورونه په نسبي یا بشپړ ډول ویجاړ شوي او شاوخوا ۸۴۰۰ کورنۍ بې ځایه شوې دي.

فطرت ټینګار وکړ چې له پاکستان سره نښته هېڅکله د کابل ادارې لومړی انتخاب نه و.

بل خوا، د دفاع وزارت ویاند عنایت الله خوارزمي هم په یوه بیان کې وویل: "د پاکستان لوري ته نږدې ۱۵۰ سرتېري وژل شوي او ۳۵ امنیتي پوستې یې په نښه شوې دي." خوارزمي دا هم وویل چې په دغو نښتو کې ۲۸ افغان سرتېري وژل شوي او ۴۲ نور ټپیان دي.

د افغانستان او پاکستان ترمنځ اختلاف
د پاکستان د اطلاعاتو وزارت د فبرورۍ په ۲۲مه اعلان وکړ چې په دغه هېواد کې له وروستیو بمي چاودنو وروسته یې د افغانستان پر سرحدي کرښه ۷ هغه نقطې په نښه کړې چې دوی "د ترهګرو کمپونه" بلل.

د افغانستان دفاع وزارت هغه مهال په یوې اعلامیه کې ویلي وو چې د پاکستان پر وړاندې به په مناسب وخت کې "مناسب او اندازه شوی ځواب" ورکړل شي. بل لور ته د پاکستان د کورنیو چارو وزیر طلال چودري ادعا کړې وه چې په دغو بریدونو کې نږدې ۷۰ "ترهګر" وژل شوي دي.

د افغانستان حکومت په کابل کې د پاکستان سفیر د بهرنیو چارو وزارت ته وغوښت او د دغو بریدونو په غبرګون کې یې ورته د احتجاج نوټ وسپاره. د حمدالله فطرت د مخکنیو معلوماتو له مخې، په متقابلو بریدونو کې ۵۲ کسان وژل شوي او ۶۶ نور ټپیان شوي وو.

له افغان حکومت څخه د پاکستان هیلې
پاکستان په ۲۰۲۱ کال کې د طالبانو له بیا واکمنېدو راهیسې په وار وار غوښتنه کړې چې نوی حکومت باید د پاکستاني طالبانو (TTP) پر وړاندې جدي ګامونه پورته کړي. اسلام اباد ټینګار کوي چې TTP په افغانستان کې پټنځایونه لري او له هغه ځایه په پاکستان کې بریدونه تنظیموي، خو کابل دا تورونه ردوي او وايي چې TTP د دوی په خاوره کې فعالیت نه لري.

ټي ټي پي (TTP) د افغانستان او پاکستان ترمنځ د ډیورنډ کرښې په دواړو غاړو کې په قبایلي سیمو کې فعاله ده؛ هغه کرښه چې د برېتانوي هند د واکمنۍ پر مهال کښل شوې او اوس د دواړو هېوادونو ترمنځ د سرحد په توګه کارول کېږي.