د ملګرو ملتونو عمومي اسمبلۍ د فلسطین په اړه پرېکړه لیک تصویب کړ
د ملګرو ملتونو عمومي اسمبلۍ د جمعې په ورځ هغه پرېکړه لیک تصویب کړ، چې د نیویارک اعلامیه تاییدوي. د دې اعلامیې موخه د فلسطین دولت په رسمیت پېژندل او د اسرائیل-فلسطین جګړې ته د دوه دولتي حل لارې موندل دي.
دا پرېکړه لیک، چې رسمي نوم یې "د فلسطین د ستونزې سوله ییز حل او د دوه دولتي حل د پلي کولو په اړه د نیویارک اعلامیې تایید" دی،د ۱۰ مخالفو او ۱۲ بې طرفه رایو په پر وړاندې د ۱۴۲ موافقو رایو په اکثریت سره تصویب شو.
دا اعلامیه چې د فرانسې او سعودي عربستان له خوا وړاندې شوې وه، د جولای په میاشت کې په نیویارک کې د ملګرو ملتونو په مرکزي دفتر کې په یوه نړیوال کنفرانس کې د ۱۷ غړو هېوادونو له خوا په ګډه لاسلیک شوې وه.
په ملګرو ملتونو کې د فرانسې دایمي استازي، جیروم بونافونټ وویل: "دا اعلامیه د هغو هڅو پایله ده چې د ۲۰۲۵ کال د جولای له ۲۸مې تر ۳۰مې نېټې پورې په نیویارک کې د جوړ شوي کنفرانس پر مهال ترسره شوې او د ۱۷ شریکو مشرانو هېوادونو په مرسته چمتو شوې ده. دا اعلامیه د دوه دولتي حل لارې د پلي کولو لپاره یوه واحده لار نقشه وړاندې کوي."
په ملګرو ملتونو کې د فلسطین دایمي استازي، ریاض منصور، له ټولو هغو هېوادونو څخه مننه وکړه چې د اعلامیې ملاتړ یې کړی او ویې ویل: "څوک چې سوله غواړي، راشئ له موږ سره یو ځای شئ. څوک چې د ژوند ژغورل غواړي، راشئ له موږ سره یو ځای شئ. څوک چې د ژوند ژغورل غواړي، راشئ له موږ سره یو ځای شئ."
اسرائیل او امریکا د دې پرېکړه لیک مخالفت وکړ. په ملګرو ملتونو کې د اسرائیل سفیر، ډیني ډانون وویل: "د دې تش په نامه اعلامیې تصویب د سولې لپاره کومه جدي هڅه نه ده." په ورته وخت کې د امریکا استازې مورګان اورټاګس وویل چې دا متن "د جګړې د پای ته رسولو لپاره جدي ډیپلوماتیکې هڅې کمزورې کوي، حماس زړور کوي او د سولې امکاناتو ته زیان رسوي."
