انقرې اعلان وکړ چې د «نتنیاهو حکومت لخوا د هڅول شویو» میشتو ترهګرو لخوا د څلورو فلسطینیانو وژل کېدل، د اسرائیل د هغې «نسل وژنې پالیسۍ پایله ده چې دوام لري.»
تورکیې د څلورو فلسطینیانو له وژل کېدو وروسته په اشغال شویو فلسطیني سیمو کې د غیرقانوني میشتو ترهګرو مخ پر زیاتیدونکی تاوتریخوالی وغنده.
د تورکیې د بهرنیو چارو وزارت د جمعې په ورځ په یوه اعلامیه کې وویل: «موږ په اشغال شویو فلسطیني سیمو کې د غیرقانوني میشتو ترهګرو مخ پر زیاتیدونکی تاوتریخوالی په کلکه غندو.»
وزارت څرګنده کړه چې د جمعې په ورځ د هغو څلورو فلسطینیانو وژنه چې د «نتنیاهو حکومت لخوا د هڅول شویو میشتو ترهګرو» لخوا ترسره شوې، د اسراییل د «نسل وژنې د روانې پالیسۍ» یوه پایله ده.
په اعلامیه کې پر نړیوالې ټولنې غږ شوی چې د فلسطیني ځمکو د غصبوونکو (میشتو ترهګرو) او د هغوی د ملاتړو لخوا د ترسره شویو جرمونو د بې سزا پاتې کېدو مخه ونیسي او ډاډ ترلاسه کړي چې مسوولین یې د عدالت په وړاندې ځواب ویونکي شي.
بنیامین نتنیاهو او د دفاع وزیر اسرائیل کاټز د جمعې په ورځ وختي، په اشغال شوې لویدیځه غاړه کې د «حوات ګیلاد» غیرقانوني مېشت ځای ته نږدې تر یوې وسله والې حملې وروسته، په فلسطیني کلیو کې د «پراخو پوځي عملیاتو» د پیلولو امر وکړ.
د اناتولیا خبري اژانس د خبریالانو د راپور له مخې، غیرقانوني اسراییلي میشتو وروسته د نابلس ولایت په «صره» او «عوریف» کلیو بریدونه وکړل او د فلسطینیانو کورونو او نورو ملکیتونو ته یې اور واچاوه. کلیوالو بیا د تیږو په ویشتلو سره د بریدګرو مقابله وکړه.
د ۲۰۲۳ کال په اکتوبر کې پر غزې د اسراییل د درنو پوځي بریدونو له پیل راهیسې، په اشغال شوې لویدیځه غاړه کې تاوتریخوالی خورا زیات شوی دی.
د فلسطیني چارواکو د معلوماتو له مخې، په دې موده کې د اسراییلي پوځ د چاپو او اشغالګرو بریدونو په پایله کې لږ تر لږه ۱۱۸۲ فلسطینیان وژل شوي، په زرګونو نور ټپیان شوي او شاوخوا ۲۴ زره کسان نیول شوي دي.
