د تورکیې جمهوریت ولسمشر رجب طیب اردوغان د سې شنبې په ورځ تېره اونۍ په قطر کې د حماس پر مرکچي پلاوي د برید له امله د اسرائیلو پر قاتل لومړي وزیر نتنیاهو سخته نیوکه وکړه او ویې ویل: "نتنیاهو له ایډیالوژیک پلوه له هټلر سره همفکره دی."

اردوغان چې په دوحه کې د اسرائیلو تر هوایي برید وروسته د عرب-اسلامي هېوادونو په بېړنۍ غونډه کې له ګډون وروسته خبرې کولې، وویل: "لکه څنګه چې هټلر د خپلو پرمختګونو تر اغېز لاندې خپله حتمي ماتې نه شوای لیدلی، نتنیاهو به هم له ورته برخلیک سره مخ شي."

اردوغان د حماس پر مرکچي پلاوي برید "د نړیوال نظام او قانون لپاره یو ښکاره ګواښ" وباله او زیاته یې کړه: "هغوی چې پر اسرائیل واکمني کوي، د یوې جنایتکارې شبکې پرته بل څه نه دي چې خپله بنسټپاله مفکوره یې په فاشیستي ایډیالوژۍ بدله کړې ده."

ولسمشر د لوېدیځو هېوادونو له خوا د فلسطین په رسمیت پېژندلو موضوع ته هم اشاره وکړه او ویې ویل چې دا کار به پر اسرائیل فشار ډېر کړي او ژمنه یې وکړه چې دا موضوع به یو ځل بیا په ملګرو ملتونو کې راپورته کړي.

اردوغان د ملګرو ملتونو په راتلونکې عمومي اسامبله کې خپله هیله څرګنده کړه چې "د انسانیت جبهه به لا پراخ ملاتړ ترلاسه کړي."

د لیبیا ملاتړ

په پای کې اردوغان په لیبیا کې د تورکیې ډیپلوماسۍ ته هم اشاره وکړه او د دغه هېواد د حاکمیت او یووالي پر ساتنې یې ټینګار وکړ. هغه وویل: "موږ د لیبیا د حاکمیت، ځمکنۍ بشپړتیا او سیاسي یووالي ساتنې ته ژمن یو او زموږ ټول اقدامات د همدې موخو پر بنسټ دي."

اردوغان دې ته په اشارې چې ترکیې له پیل څخه د طرابلس د مشروع حکومت ملاتړ کړی او په دې وروستیو کې یې د لیبیا له ختیځ سره د ډیپلوماتیکو اړیکو د پرانیستلو هڅه کړې ده، وویل: "زموږ دا څو اړخیزې ډیپلوماتیکې هڅې د ترکیې د سیمه ییز لیدلوري او سولې ته د رسېدو په برخه کې د هغې د موخو ښکارندويي کوي."

پر دې سربېره، ولسمشر وویل چې د بنغازي ادارې له خوا د انقرې او طرابلس ترمنځ د لاسلیک شوي سمندري واک تړون تصویبول به "د نړیوال قانون له نظره یوه لویه لاسته راوړنه" وي.