د تورکیې د ټکنالوژۍ مخکښه فیستیوال ټیکنوفیست (TEKNOFEST) د چهارشنبې په ورځ په استانبول کې د لیدونکو پر مخ پرانیستل شوه.

دغه فیستیوال چې د استانبول په اتاترک هوايي ډګر کې به پنځه ورځې دوام وکړي، د تورکیې د ټیکنالوژۍ ټیم (T3) بنسټ او د تورکیې د صنعت او ټیکنالوژۍ وزارت له لوري جوړیږي.

ټیکنوفیست له ۲۰۱۸ کال راهیسې د لسګونو دولتي ادارو، د خصوصي سکټور د شریکانو او پوهنتونونو په ملاتړ ترسره کیږي.

ټیکنوفیست، چې هر کال د خپلو نویو سیالیو د کټګوریو له امله پام ځانته رااړوي، سږکال ۵۸ اصلي فعالیتونه او ۱۳۷ فرعي کټګورۍ لري.

د نړۍ له ګوټ ګوټ څخه دې فیستیوال ته راغلي ګډونوال د خپلو معلوماتو او تجربو په شریکولو سره د ټیکنالوژۍ د پراختیا په برخه کې مهم پرمختګونه کوي.

ټیکنالوژي، هیجان او الوتنه

ټیکنوفیست به نه یوازې د ټیکنالوژۍ سیالیو، بلکې د یو لړ اغېزناکو فعالیتونو کوربه هم وي او د یکشنبې تر ورځې به د لیدونکو پرمخ پرانیستی وي.

په دې فیستیوال کې زړه راښکونکې هوايي نندارې، بېلابېل نندارتونونه او ورکشاپونه، اغېزناک تمثیلي (سیمولیشن) ډګرونه، یو پلانیټاریم (سیاره ننداره)، سوداګریز نندارتونونه او د زده کوونکو لپاره ځانګړې الوتنې شاملې دي. دا ټول فعالیتونه ټیکنالوژي او هیجان سره یو ځای کوي.

دغه غونډه په جفتو کلونو کې د ترکیې په بېلابېلو ښارونو کې او په طاقو کلونو کې په استانبول کې جوړیږي.

دغه فیستیوال تر دې دمه په دوو بهرنیو هېوادونو کې هم ترسره شوی دی: آذربایجان او د شمالي قبرس ترکي جمهوریت.

د ټیکنوفیست سمندري نسخه، چې "ماوي وطن" (آبي وطن) نومیږي، تېره میاشت په استانبول کې جوړه شوې وه.

تېر کال ټیکنوفیست فیستیوال، چې د ترکیې په جنوبي ښار اډانا کې جوړ شوی و، شاوخوا ۱.۱ میلیونه لیدونکي یې لرل.

تر دې دمه له ټیکنوفیست څخه په مجموعي ډول شاوخوا ۱۱ میلیونو کسانو لیدنه کړې ده.