د تورکیې ولسمشر رجب طیب اردوغان تورکیې، منځنۍ اسیا او په ځانګړې توګه د  سوریې، عراق او ایران خلکو ته  د نوروز مبارکي وړاندې کړه او هیله یې څرګنده کړه چې دا ورځ به د سیمه ییزو شخړو په پای ته رسولو کې ونډه واخلي.

ولسمشر رجب طیب اردوغان د شنبې په ورځ د مارچ ۲۱مې د نوروز د نمانځنې پروګرام ته په یوه ویډیويي پیغام کې هیله څرګنده کړه چې دا مناسبت به په سیمه کې د شخړو په پای ته رسولو کې ونډه واخلي.

د تورکیې په سویل ختیځ غازي عنتاب ولایت کې د کامل اوجاک په سپورټي سالون کې جوړې شوې غونډې ته په خپل پیغام کې، اردوغان "زموږ د زړه او کلتوري جغرافیې" په اوږدو کې د نوروز ټولو نمانځونکو ته مبارکي وویله.

هغه نوروز د پسرلي زېری او د طبیعت د بیا راژوندي کېدو نښه وبلله، او خپله هیله یې څرګنده کړه چې دا ورځ به تورکیې، پراخې سیمې او ټول بشریت ته سوله، هوساینه او ښېرازي راوړي.

اردوغان وویل، خوښ دی چې نوروز نه یوازې د تورکیې لپاره، بلکې د ګاونډیانو لپاره یې هم د نوي پیل په سمبول بدلیږي.

هغه وویل: "موږ په ټولو ۸۱ ولایتونو او په ټوله تورکي نړۍ کې په ورته احساساتو د نوروز د اور شاوخوا راټولیږو." هغه زیاته کړه چې نوروز د یووالي د دې احساس د پیاوړتیا لپاره د یوې ګډې ورځې په توګه منل شوی دی.

هغه دا هم یاده کړه چې تورکیه به په ۲۰۲۶ کال کې د کورنۍ شورا (Family Council) د ۱۳مې سرمشریزې کوربه وي، چې موخه یې د دې خوځښت لا پیاوړتیا ده.

اردوغان "له اذربایجان څخه تر قزاقستان، له قرغزستان څخه تر ازبکستان، له ترکمنستان څخه د شمالي قبرس ترک جمهوریت او هنګري پورې خپلو ټولو په خټه تورکانو  او وروڼو" ته خپلې مبارکۍ وړاندې کړې.

هغه وویل: "زه خپلو سوري، عراقي او ایراني وروڼو ته هم د نوروز مبارکي وایم، کوم چې اوسمهال د جګړې له امله له ستونزو سره مخ دي، او هیله لرم چې دا مانا لرونکې ورځ به زموږ په سیمه کې د جګړو په پای ته رسولو کې ونډه واخلي."

هغه زیاته کړه: "هیله لرم چې د نوروز له خوا راوړل شوی پسرلنی چاپېریال زموږ زړونو ته هیلې، ټولنو ته مو سوله او نړۍ ته مو امن راوړي."