د تورکیې د ملي دفاع وزارت په وینا، دغه توغندی وروسته له هغه وپېژندل شو چې د عراق او سوریې له هوايي حریم څخه تېر شو او د متحدینو د دفاعي سیسټمونو له خوا په بریالیتوب سره له منځه یووړل شو.

متحده عربي اماراتو او د اسلامي همکاریو سازمان (OIC) پر تورکیې باندې د ایران د بالستیک توغندي د توغولو هڅه په کلکه وغندله. هغوی دا یو جدي کړکېچ او د دولت د حاکمیت سرغړونه وبلله. دا غبرګون وروسته له هغه څرګند شو چې دغه توغندی د ناټو د هوايي او ميزایلي دفاعي سیسټمونو له خوا شنډ کړای شو.

د متحده عربي اماراتو د بهرنیو چارو وزارت د پنجشنبې په ورځ په یوه اعلامیه کې وویل، دوی دغه ډول دښمنانه اعمال یو "جدي کړکېچ، د هېواد د حاکمیت څخه ښکاره سرغړونه او د سیمې امنیت او ثبات ته مستقیم ګواښ" بولي.

په اعلامیه کې زیاته شوې: "نورو هېوادونو ته د بریدونو غځول د ټولو قانوني او سیاسي نورمونو خلاف او د نه منلو وړ عمل دی، او دا یو جدي کړکېچ دی چې د وضعیت د کابو کولو هڅې له منځه وړي او سیمه ییزې ترینګلتیاوې زیاتوي."

په ورته وخت کې، د اسلامي همکاریو سازمان (OIC) له تورکیې سره خپل بشپړ پیوستون اعلان کړ او د دغه هېواد د حاکمیت، امنیت او ثبات په دفاع کې یې د خپل ثابت ملاتړ ډاډ ورکړ. د دغه سازمان عمومي دارالانشا د هر هغه اقدام د سمدستي درېدو غوښتنه وکړه چې کولی شي ترینګلتیاوې زیاتې کړي او سیمه بې ثباته کړي.

دې سازمان ټینګار وکړ چې د غړو هېوادونو ګواښل او د هغوی امنیت زیانمنول د نړیوالو اړیکو له اصولو سره په ټکر کې دي، کوم چې د ښه ګاونډیتوب او متقابل احترام پر بنسټ ولاړ دي.

د تورکیې د ملي دفاع وزارت د معلوماتو له مخې، دغه توغندی وروسته له هغه وپېژندل شو چې د عراق او سوریې له فضا څخه تېر شو او د متحدینو د دفاعي سیسټمونو له خوا پرې برید وشو. د توغندي پاتې شونې د تورکیې په سویل کې د هاتای ولایت په "دورت یول" ولسوالۍ کې لوېدلي، چې له نېکه مرغه چاته پکې مرګ ژوبله نه ده اوښتې.

په دیپلوماتیک غبرګون کې، تورکیې په انقره کې د ایران سفیر محمد حسن حبیب الله زاده د بهرنیو چارو وزارت ته احضار کړ. په دې لیدنه کې، انقرې د دې پېښې په اړه خپل کلک احتجاج او ژوره اندېښنه څرګنده کړه. چارواکو ټینګار وکړ چې د هر هغه ګام څخه باید په هر قیمت ډډه وشي چې د شخړو د پراخېدو او د سیمې د لا زیاتې بې ثباتۍ لامل کېږي.