پاکستان کې په یوه برید کې ۵ پولیس ټپیان شول
د پاکستان په شمال لوېدیځ خیبر پښتونخوا ایالت کې د پولیسو پر یوې امنیتي پوستې په وسله وال برید کې د ۵ پولیسو د ټپي کېدو خبر ورکړل شوی دی.
د پاکستاني رسنیو د خبر له مخې، سیمه ییزو پولیسو اعلان کړی چې د خیبر پښتونخوا په بنو سیمه کې د پولیسو پر یوې امنیتي پوستې وسله وال برید شوی دی.
پولیسو ویلي، چې امنیتي ځواکونو پر وخت اقدام کړی او برید یې په شا تمبولی دی. همدارنګه یې زیاته کړې، چې نښته درې ساعته روانه وه او څو تنه وسله وال پکې له منځه وړل شوي دي.
پولیسو ویلي چې په برید کې ۵ تنه پولیس ټپیان شوي او د درملنې لپاره روغتون ته لېږدول شوي دي.
پرون هم د شېخ لنډک په سیمه کې د فوټبال لوبې پر مهال د لوبې پر ډګر د ډرون برید له امله لږ تر لږه ۷ تنه، چې ماشومان هم پکې شامل وو، ټپیان شوي وو.
د پاکستان د ترهګرۍ ستونزه
په پاکستان کې وسله وال بریدونه په ځانګړې توګه خیبر پښتونخوا او بلوچستان ایالتونو کې، ډېر شوي دي.
په دواړو ایالتونو کې هغه وسله والې ډلې چې د پښتنو او بلوڅو توکمیزو ډلو د حقونو د دفاع ادعا کوي، د پاکستان پر امنیتي ځواکونو او ملکي وګړو بریدونه ترسره کوي.
اسلام اباد ادعا کوي چې ټي ټي پي (TTP) په افغانستان کې ځای پر ځای شوې او له هغه ځایه خپل بریدونه تنظیموي، خو افغان حکومت دا ادعاوې ردوي.
خو په بلوچستان کې بیا د بلوچستان د ازادۍ پوځ (BLA) بریدونه ډېر تر سترګو کېږي. بي اېل اې له پاکستان څخه د بلوچستان ایالت د جلا کېدو او پر دې سیمه د بلوڅ ولس د واکمنۍ غوښتنه کوي.
