پاکستان: په بلوچستان کې په تېرو ۳ میاشتو کې په ترسره شوو عملیاتو کې تر ۱۰۰ ډېر وسله وال وژل شوي دي

پاکستان اعلان کړی چې په سوېل لوېدیځ بلوچستان ایالت کې یې په تېرو درېیو میاشتو کې د عملیاتو په ترڅ کې تر ۱۰۰ ډېر وسله وال له منځه وړي دي.

د پاکستاني رسنیو د راپور له مخې، په بلوچستان ایالت کې د کورنیو چارو لوړپوړي چارواکي، محمد حمزه شفقت، د بلوچستان د اعلی وزیر میر سرفراز بګټي په مشرۍ جوړه شوې غونډه کې وویل چې امنیتي ځواکونو په تېرو درېیو میاشتو کې په سیمه کې د استخباراتي معلوماتو پر بنسټ تر ۲۰۰ ډېر عملیات ترسره کړي دي.

شفقت زیاته کړه چې د دغو عملیاتو په ترڅ کې تر ۱۰۰ ډېر وسله وال وژل شوي دي. هغه دا هم وویل چې د تېلو ۳۵۶۱ ناقانونه پمپونه مهرلاک شوي او د ګمرکونو لخوا په ۲۵۷۵ عملیاتو کې ۴۱۶ بې ګمرکه موټر نیول شوي دي.

شفقت وویل چې د ایالت په بېلابېلو سیمو کې د ترهګریزو شبکو او جرمي ډلو پر وړاندې عملیات دوام لري.

د پاکستان د ترهګرۍ ستونزه

په پاکستان کې وسله وال بریدونه، په ځانګړې توګه له افغانستان سره پر پوله پراته خیبر پښتونخوا او بلوچستان ایالتونو کې ډېر شوي دي.

په دواړو ایالتونو کې هغه وسله والې ډلې چې د پښتنو او بلوڅو قومونو د حقونو د دفاع ادعا کوي، د پاکستان پر امنیتي ځواکونو او ملکي وګړو بریدونه ترسره کوي.

اسلام اباد ادعا کوي چې پاکستاني طالبان (TTP) په افغانستان کې مېشت دي او له هغه ځایه خپل بریدونه تنظیموي، خو افغان حکومت دا ادعاوې ردوي.

له بلې خوا په بلوچستان کې بیا د بلوچستان د ازادۍ پوځ (BLA) بریدونه ډېر تر سترګو کېږي. بي اېل اې له پاکستان څخه د بلوچستان ایالت د بېلتون او پر دې سیمه د بلوڅ ولس د واکمنۍ غوښتونکې ده.