د ليبيا لومړي وزیر عبدالحمید دبیبه د سه شنبې په ورځ وویل چې په پلازمېنه طرابلس کې د وسله والو نښتو وروسته امنیت بېرته ټینګ شوی دی.

د بیړني طبي خدماتو ادارې د فرانس پریس خبري اژانس ته ویلي چې په دې نښتو کې لږ تر لږه شپږ کسان وژل شوي دي، په داسې حال کې چې ځايي رسنیو راپور ورکړی چې د یوه وسله والې ډلې مشر هم په وژل شویو کې شامل دی.

د بیړني طبي خدماتو او ملاتړ مرکز راپور ورکړی چې "د ابو سلیم په سیمه کې د نښتو له ځایونو څخه شپږ مړي ترلاسه شوي دي." دا سیمه د طرابلس یوه برخه ده.

د لیبیا رسنیو د راپور له مخې, تاوتریخوالی د دوشنبې په ورځ په پلازمېنه کې د عبدال غني الککلي تر وژل کېدو وروسته پیل شو. هغه د ثبات د ملاتړ ادارې مشري کوله چې د ولسمشرۍ شورا پورې تړلې ده.

دبیبه په خپل بیان کې وویل: "زه د کورنیو چارو او دفاع وزارتونو، او د پوځ او پولیسو ټولو غړو ته د پلازمېنې امنیت د بیا ټینګښت او د دولت د واکمنۍ د پیاوړتیا لپاره د دوی د لویې لاسته راوړنې مبارکي وایم." هغه دا خبرې په ایکس (پخوانی ټویټر) کې کړې.

هغه زیاته کړه: "هغه څه چې نن ترلاسه شوي دي، دا ثابتوي چې د دولت قانوني ادارې د ملت د ساتنې او د خپلو وګړو د عزت د خوندي کولو وړتیا لري."

لومړي وزیر د دې غوښتنه وکړه چې "غیر منظمې ډلې باید ختمې شي او دا اصل پیاوړی شي چې په لیبیا کې یوازې د دولت ادارې شتون ولري او یوازې د قانون واکمنۍ وي."

ځايي رسنیو، په شمول د لیبیا الاحرار ټلویزیون، راپور ورکړی چې د ککلي تر وژل کېدو وروسته په پلازمېنه کې د ډزو غږونه اورېدل شوي دي.

د راپورونو له مخې، د دفاع وزارت پورې تړلې ۴۴۴مه لوا د دې نښتو په ترڅ کې د ثبات د ملاتړ ادارې له ځواکونو سره ښکېله وه.

د لیبیا د دفاع وزارت تایید کړې چې ځواکونو یې د ابو سلیم په سیمه بشپړ کنټرول ترلاسه کړی دی او ویلي یې دي چې د نښتو د کنټرول لپاره یې پوځي عملیات په بریالیتوب پای ته رسېدلي دي.

لیبیا لا هم د امنیتي بحرانونو سره مخ ده چې د ۲۰۲۲ کال راهیسې د سیاسي وېش له امله رامنځته شوي دي.

په لیبیا کې دوه سیال حکومتونه د واک ادعا کوي: په طرابلس کې د ملي یووالي نړیوال پیژندل شوی حکومت چې د دبیبه په مشرۍ لویدیځ کنټرولوي، او په بنغازي کې یو موازي حکومت چې د استازو د مجلس له خوا ټاکل شوی او د اسامه حماد په مشرۍ د ختیځې برخې او ځینو جنوبي ښارونو واک لري.

د ملګرو ملتونو تر مشرۍ لاندې د ملي ټاکنو د ترسره کولو هڅې کلونه کېږي چې ځنډېدلې دي، چې د هېواد سیاسي وېش او وسله والې شخړې يې اوږدې کړي دي.