د داعش ترهګرې ډلې د تش په نامه "تورکیې ولایت" د جوړښت مسؤل او د "فاروق دفتر" په نوم د مشهورې څانګې مشر طالب ګولر په سوریه کې له نیول کېدو وروسته تورکیې ته راوړل شو.
د تورکیې د ملي استخباراتو ادارې د داعش پر وړاندې په خپلو عملیاتو کې، د دغې ډلې د تش په نامه تورکیې ولایت په جوړښت کې فعال غړی "عبدالسلام ترکي" په مستعار نوم طالب ګولر ونیوه او تورکیې ته یې راووست.
د امنیتي سرچینو د معلوماتو له مخې، د تورکیې د ملي استخباراتو ریاست د داعش د هغې ډلې پر وړاندې عملیات ترسره کړل چې د "فاروق دفتر" په نوم یادېږي او د تورکیې ولایت د جوړښت چارې مخته وړي.
د استخباراتي څېړنو په پایله کې معلومه شوه چې طالب ګولر د قاسم ګولر ورور دی. قاسم ګولر تر ۲۰۲۱ کال وړاندې د داعش د تش په نامه "تورکیې ولایت مسؤل" او د "فاروق دفتر" د مالي چارو مسؤل و، چې په ۲۰۲۱ کال کې د ورته عملیاتو په ترڅ کې تورکیې ته راوستل شوی و.
د ترسره شویو څېړنو له مخې، طالب ګولر چې د تورکیې د امنیتي ارګانونو لخوا لټول کیده، د ۲۰۱۴ کال په جنوري میاشت کې په ناقانونه توګه سوریې ته تللی و. معلومه شوه چې ګولر په سوریه کې خپل فعالیتونه د خپل ورور قاسم ګولر او د ډلې له نورو مشرانو سره په همغږۍ ترسره کول.
د تورکیې ملي استخباراتو د قاسم ګولر له نیولو وروسته د هغه د ورور طالب ګولر په اړه پلټنې زیاتې کړې او د دغه ترهګر فعالیتونه یې ګام په ګام وڅارل، ترڅو یې بلاخره د جګړې له سیمو څخه تورکیې ته راوېستل شوني کړل.
طالب ګولر تورکیې ته له راوړل کېدو وروسته په خپلو اعترافاتو کې د ډلې په ګټه د خپلو فعالیتونو په اړه معلومات ورکړل. ګولر په خپلو څرګندونو کې په تورکیه کې د سختدریځۍ (راډیکالیزم) د پروسې، په پټو لارو سوریې ته د تګ، له داعش سره د یوځای کېدو او له خپل ورور قاسم ګولر سره د مالي چارو په برخه کې د فعالیتونو جزئیات بیان کړل.
ویل شوي چې د تورکیې د ملي استخباراتو ادارې لخوا دا ډول عملیات د تورکیې پر وړاندې د داعش د بریدونو د پلانونو د مخنیوي، د نویو غړو د جذبولو د پروسې د افشا کولو او د ترهګریزو پلانونو د شنډولو په موخه په پرېکنده توګه دوام لري.
