د روسیې او اوکراین ترمنځ د ډرون بریدونو له امله یو کس وژل شوی او څو نور ټپیان دي
کییف وايي، مسکو تېره شپه ۱۳۵ ډرونونه توغولي چې د انرژۍ تاسیسات یې په نښه کړي، په داسې حال کې چې روسیې د ولګوګراد په سیمه کې د یوه ملکي کس د وژل کېدو راپور ورکړی دی.
د اوکراین ولسمشر ولادیمیر زیلینسکي ویلي چې روسیې تېره شپه ۱۳۵ برید کوونکي ډرونونه توغولي، چې د هېواد په بېلابېلو سیمو کې یې د انرژۍ تاسیسات په نښه کړي، او لږ تر لږه اته تنه په دنیپرو سیمه کې ټپیان شوي دي.
زیلینسکي د پنجشنبې په ورځ په ټیلیګرام کې وویل: «د اوکراین لپاره بله بده شپه وه. روسانو زموږ ښارونه د ډرونونو په وسیله وځپل — ټولټال ۱۳۵ برید کوونکي بې پیلوټه الوتکې. په کامیانسکې ښار د برید له امله اته کسان ټپیان شوي، یو استوګنیزه ودانۍ زیانمنه شوې، او د اورګاډي تاسیساتو هم تاوان ليدلې.»
په ورته وخت کې، د اوکراین د دفاع وزارت ویلي چې د هوايي دفاع ځواکونو د روسیې له سیمو، لکه کورسک، اوریول او پریمورسک-اختارسک څخه توغول شويو ۱۰۸ ډرونونه وویشتل یا یې شنډ کړل.
وزارت وویل چې "هوایي دفاع د هیواد په شمال، سویل او ختیځ کې د دښمن ۱۰۸ ډرونونه ویشتلي دي،" او زیاته یې کړه چې ۲۷ ډرونونه په ۱۳ ځایونو کې هدفونه ويشتلي.
له بلې خوا، د روسیې د دفاع وزارت ویلي چې د هېواد د هوايي دفاع سیستمونو په څو سیمو کې، په شمول د ولګوګراد، کریمیا، وورونژ او روستوف، ۷۵ اوکرایني ډرونونه شنډ او ویجاړ کړي دي.
د ولګوګراد د سیمې والي، اندري بوچاروف، ویلي چې یو کس هغه وخت ووژل شو چې د یو ډرون د برید له امله د استوګنې په یوه ودانۍ کې د چاودنې ټوټې پرې ولګېدې.
هغه زیاته کړه: «د ترهګریز ډرون برید له امله بالکونونه زیانمن شوي او کړکۍ ماتې شوې دي. یو ملکي کس وژل شوی.» بوچاروف وویل، د برید پاتې شونو په یوه صنعتي سیمه کې اور بل کړی دی.
