اسرائیلو په فلسطین کې د مسیحیانو شتون له منځه وړی دی. دا خبره یوې فلسطیني مسیحي کمیټې کړې ده.
یوې فلسطیني مسیحي کمیټې د نتنیاهو هغه بې بنسټه ادعاوې رد کړې چې ګواکې اسرائیل په منځني ختیځ کې یوازینی هېواد دی چې د مسیحیانو ساتنه کوي، او ویلي یې دي چې اسرائیلو له ۱۹۴۸ راهیسې په فلسطین کې د مسیحیانو شتون له منځه وړی دی.
یوې فلسطیني حکومتي ادارې ویلي، چې اسرائیلو په فلسطین کې د مسیحیانو شتون له منځه وړی او په غزه کې د روانې تباهۍ په ترڅ کې د کلیساګانو او د هغوی د بنسټونو بمبارولو ته دوام ورکوي.
په فلسطین کې د کلیساګانو د چارو عالي صدارتي کمیټې، په فیسبوک کې د یوې اعلامیې په خپرولو سره د اسرائیلو د لومړي وزیر بنیامین نتنیاهو هغې وینا ته ځواب ورکړ چې د جمعې په ورځ یې د ملګرو ملتونو په عمومي اسامبله کې کړې وه. په دې اعلامیه کې د ۲۰۰۲ کال د لویدیځې غاړې د یرغل پر مهال د بیت لحم د زیږون کلیسا بهر د یوه اسرائیلي ټانک عکس هم خپور شوی و. نتنیاهو په خپله وینا کې ادعا کړې وه چې اسرائیل په منځني ختیځ کې یوازینی دولت دی چې د مسیحیانو ساتنه کوي.
کمیټې وویل: "د ملګرو ملتونو د عمومي اسامبلې په تقریبا خالي تالار کې، جنګي جنایتکار او د جرمونو د نړیوالې محکمې تښتېدلي، بنیامین نتنیاهو یو ځل بیا د فلسطیني مسیحیانو په اړه درواغ خپاره کړل."
"حقیقت روښانه دی: د اسرائیلو استعماري پالیسیو، توکمیزې تصفیې، اپارټایډ او نسل وژنې په فلسطین کې د مسیحیانو شتون له منځه وړی دی."
دغې کمیټې ویلي چې د ۱۹۴۸ کال له نکبې یا "لوی ناورین" څخه مخکې، فلسطیني مسیحیانو د تاریخي فلسطین د نفوس ۱۲.۵ سلنه جوړوله، کله چې د اسرائیل دولت د جوړېدو پر مهال په سلګونو زره خلک له خپلو کورونو وشړل شول. کمیټې یادونه کړې چې نن ورځ، دوی په تاریخي فلسطین کې د نفوس یوازې ۱.۲ سلنه او په هغو سیمو کې چې په ۱۹۶۷ کې اشغال شوې، یوازې ۱ سلنه جوړوي.
د کمیټې په وینا، دا کمښت "د اسرائیلو د توکمیزې تصفیې، جبري بې ځایه کولو، د ځمکو د غصب او منظمې ځپنې مستقیمه پایله ده."
دې کمیټې د بېلګو په توګه د نکبې پر مهال د ۹۰،۰۰۰ فلسطیني مسیحیانو بې ځایه کېدل او د شاوخوا ۳۰ کلیساګانو جبري تړل یاد کړل.
دې کمیټې همدارنګه په ۱۹۴۸ کال کې په بیت المقدس کې د سیمیرامیس هوټل په بمي چاودنه کې د هاګانا په نوم د یهودي نیمه پوځي ډلې له خوا د ۲۵ فلسطیني مسیحیانو وژل او په هماغه کال د ناصره ښار ته نږدې په عیلبون کلي کې د ۱۲ مسیحیانو اعدامول هم یاد کړل.
د مسیحیانو کورونه او کلیساګانې هم خوندي نه دي
کمیټې یادونه کړې چې د ۲۰۲۳ کال له اکتوبر راهیسې په غزه کې د روانې جګړې پر مهال، اسرائیلو د سینټ پورفیریوس یوناني ارتودوکس کلیسا او د سپېڅلې کورنۍ کاتولیک کلیسا بمبار کړې، او هغه ملکي وګړي یې په ډله ییزه توګه ووژل چې هلته یې پناه اخیستې وه. همدارنګه یې د کلیسا اړوند بنسټونه لکه الاهلي عرب روغتون او د عرب ارتودوکس کلتوري او ټولنیز مرکز په نښه کړي دي.
دې کمیټې زیاته کړې چې د مسیحیانو کورونه هم بمبار شوي، چې کورنۍ یې په کلیساګانو کې پناه اخیستو ته اړې کړې، خو کلیساګانې پخپله هم د اسرائیلو له بریدونو خوندي نه وې.
کمیټې ویلي، چې د غزې د بریدونو له پیل راهیسې ۴۴ فلسطیني مسیحیان یا په مستقیم ډول د بمباریو له امله او یا هم په غیر مستقیم ډول د سختو بشري شرایطو، د خوړو او درملو د کمښت له امله وژل شوي دي.
په اشغال شوې لویدیځه غاړه کې، کمیټې رام الله ته نږدې د طیبه په مسیحي کلي د ابادګرو جنګیالیو ډلو له خوا د پرله پسې بریدونو راپور ورکړی. دې کمیټې دا خبرداری هم ورکړی چې په ټول فلسطین کې کلیساګانې "له یوه بې ساري ګواښ سره مخ دي چې په سپېڅلې ځمکه کې د دوی تاریخي شتون او دوامداره ماموریت ګواښي."
دې اعلامیې همدارنګه په بیت المقدس کې د اسرائیلو له خوا د ارتودوکس پټریارک د حسابونو کنګل کولو، د وضعیت د سرغړونې په ترڅ کې د کلیسا پر ملکیتونو د درنو مالیاتو لګولو او د ارمني کلیسا د ملکیتونو غصب ته هم اشاره کړې ده.
کمیټې ویلي، په بیت لحم کې، چې د عیسی (ع) د زیږون ځای دی، "غیرقانوني میشت ځایونه، پوځي پوستې او د جلا کولو دیوال دا ښار ځپي، په داسې حال کې چې د فلسطیني مسیحیانو ځمکې د میشت ځایونو د جوړولو لپاره غصب کیږي." دې کمیټې زیاته کړې چې بیت لحم نن ورځ د ۱۵۰ څخه د زیاتو خنډونو، دروازو او خاورینو ډنډونو لخوا محاصره دی – چې دا په لویدیځه غاړه کې ترټولو لوړ شمېر دی.
کمیټې ټینګار وکړ: "حقیقت نشي رد کېدای: اسرائیلو په سپېڅلې ځمکه کې د مسیحیانو شتون له منځه وړی، او په ملګرو ملتونو کې د نتنیاهو درواغ نه تاریخ او نه هم د اسرائیلو د استعماري واکمنۍ لاندې د فلسطیني ژوند – که مسیحیان وي او که مسلمانان – حقیقت له منځه وړلی شي."
کمیټې ټینګار وکړ چې "په فلسطین کې د مسیحي شتون دفاع نه یوازې یوه سیمه ییزه مسله ده، بلکې یوه نړیواله بشري، اخلاقي او حقوقي قضیه ده."
