ټرمپ په سوریه کې د دریو امریکایانو تر وژل کېدو وروسته داعش ته لوی ګواښ وکړ.
د سوریې چارواکو د لرغوني ښار پلمیرا ته نږدې تر برید وروسته د یکشنبې په ورځ د حمص ولایت په کلیوالي سیمو کې د داعش د حجرو پر ضد امنیتي عملیات پیل کړل.
د امریکا ولسمشر ډونالډ ټرمپ ژمنه کړې چې په سوریه کې د داعش د هغه برید عاملینو ته به سخت ځواب ورکړي چې دوه امریکايي سرتیري او یو ملکي وګړی پکې ووژل شول.
ټرمپ وویل: "زه تاسو ته ویلی شم، په سوریه کې به هغو خلکو ته چې دا کار یې کړی، ډېر لوی زیان ورسیږي. هغوی هغه کس ونیو... خو لوی زیان به ورته ورسیږي."
د سوریې د کورنیو چارو وزارت د یکشنبې په ورځ وویل، سوریې پنځه کسان د شنبې په ورځ د سوریې په مرکزي ښار پلمیرا کې پر امریکايي او سوري ځواکونو د ډزو په تړاو نیولي دي.
برید د سوریې او امریکا د اړیکو د خرابولو لپاره و
د سوریې د بهرنیو چارو وزیر اسعد الشیباني او د امریکا د بهرنیو چارو وزیر مارکو روبیو ترمنځ د یکشنبې په ورځ په یوه ټیلیفوني اړیکه کې، دواړو هېوادونو وویل چې د پلمیرا لرغوني ښار ته نږدې د داعش خونړی ترهګریز برید د دواړو هېوادونو د نویو اړیکو د کمزوري کولو په موخه و.
د سوریې د بهرنیو چارو وزارت د یوې اعلامیې له مخې، دواړو خواوو د ترهګرۍ پر وړاندې په مبارزه کې د همکارۍ او د سیمه ییز ثبات د ټینګښت په برخه کې پر خپلې ژمنې بیا ټینګار وکړ.
د دې ټیلیفوني خبرو پر مهال، دواړو لوړپوړو ډیپلوماتانو ومنله چې دا "بزدلانه عمل" د سوریې او امریکا د نویو اړیکو د ګډوډولو لپاره و.
الشیباني دا برید د ترهګرۍ پر وړاندې مبارزه کې یو نوی ګواښ وباله او له نړیوالو شریکانو، په ځانګړې توګه له امریکا سره، د ګډو هڅو د پیاوړتیا پر اهمیت یې ټینګار وکړ.
د سوریې وزیر د ولسمشر احمد الشرع له لوري د امریکا ولسمشر ډونالډ ټرمپ ته خپله خواخوږي څرګنده کړه او له سوریې څخه د واشنګټن له ملاتړه یې مننه وکړه.
د امریکا مرکزي قوماندانۍ (CENTCOM) د شنبې په ورځ وویل چې د پلمیرا په دښته کې د داعش د یوه وسله وال په کمین کې دوه امریکايي سرتیري او یو ملکي وګړی وژل شوي او درې نور سرتیري ټپیان دي.
د سوریې چارواکو د لرغوني ښار پلمیرا ته نږدې تر برید وروسته د یکشنبې په ورځ د حمص ولایت په کلیوالي سیمو کې د داعش د حجرو پر ضد امنیتي عملیات پیل کړل.
په سوریه کې د امریکا ځواکونه په ۲۰۱۴ کال کې د داعش ضد نړیوال ایتلاف د یوې برخې په توګه فعالیت کوي. سوریه د ۲۰۲۵ کال د نومبر په ۱۲مه له دې ایتلاف سره یوځای شوه.
د ۲۰۲۴ کال په ډسمبر کې د بشارالاسد د پخواني رژیم تر نسکورېدو وروسته، د سوریې نوې اداره په ټول هېواد کې د امنیت د ټینګښت او د شرایطو د باثباته کولو په هڅه کې ده.
