اسراییلو د غزې د لوږې د پالیسۍ له مخې یو بل فلسطینی ماشوم وواژه

په غزه کې یو دوه کلن ماشوم د اسرائیلو د پوځي یرغل، کلابندۍ او د لوږې له امله مړ شو، په داسې حال کې چې عامو خلکو ته خواړه او درمل نه رسېږي.

د سیمې روغتیايي چارواکو د پنجشنبې په ورځ وویل، یو دوه کلن هلک په غزه کې د سختې خوارځواکۍ له امله ومړ، ځکه چې د اسرائیلو کلابندۍ او پوځي بریدونو په دې سیمه کې بشري بحران لا ژور کړی .

ډاکټرانو وویل چې احمد سمیر عبدالعال د خان یونس په ناصر روغتون کې ساه ورکړه.

د ماشوم وزن د مړینې پر وخت یوازې ۸ کیلوګرامه (۱۷.۶ پونډه) و، حال دا چې د هغه د عمر لپاره باید لږ تر لږه ۱۲ کیلوګرامه (۲۶ پونډه) وای.

احمد او د هغه کورنۍ له رفح څخه تښتېدلي وو او د خان یونس لویدیځ ته په المواسي سیمه کې یې په یوه لنډمهاله خیمه کې پناه اخیستې وه، چیرې چې د خوړو، شیدو او لومړنیو اړتیاوو ته لاسرسی د اسرائیلو د دوامدارو محدودیتونو له امله نږدې ناممکن دی.

د هغه مړینه په غزه کې د سختې لوږې د پراخېدو جدي حالت ته اشاره کوي، چیرې چې اسرائیل له پنځو میاشتو راپدېخوا پوله تړلې ده او اساسي خواړه، درمل او د ماشوم شیدې یې بندې کړي دي.

د غزې د روغتیا وزارت په وینا، د اسرائیلو د نسل ‌وژنې جګړې له پیل (د ۲۰۲۳ کال د اکتوبر ۷) راهیسې، تر اوسه لږ تر لږه ۱۶۰ فلسطینیان — چې ۹۱ یې ماشومان دي — د لوږې او خوارځواکۍ له امله مړه شوي دي.

په غزه کې نسل ‌وژنه

د ملګرو ملتونو د خوړو نړیوال پروګرام (WFP) د سه شنبې په ورځ خبرداری ورکړی چې په غزه کې له هرو درې تنو څخه یو، څو ورځې له خوړو پرته تېروې، او وضعیت یې د "تر ټولو بد حالت" لوږې په توګه بیان کړ.

د اسرائیلو د نسل ‌وژنې جګړه کې د مړو شمېر تر ۶۰،۲۰۰ اوښتی، ځکه چې د بې ‌وقفې بمبارۍ له امله دا سیمه ویجاړه شوې او د خوړو کمښت رامنځته شوی.

د دوشنبې په ورځ، د اسرائیلو د بشري حقونو ډلې بتسیلم او Physicians for Human Rights (ډاکټران د بشري حقونو لپاره) اسرائیل په غزه کې د نسل ‌وژنې په ترسره کولو تورن کړ، د فلسطیني ټولنې د سیستماتیک له‌ منځه وړلو او د روغتیايي نظام د قصدي ویجاړولو ته یې اشاره وکړه.

تېر نومبر، نړیوالې جنایي محکمې (ICC) د اسرائیلو د لومړي وزیر بنیامین نتنیاهو او د هغه پخواني دفاع وزیر یواف ګالانت د نیولو حکمونه صادر کړل، د غزې په جګړه کې د جنګي جنایتونو او د بشریت ضد جنایتونو په تور.

اسرائیل همداراز د غزې پر ضد د جګړې له امله د نړیوال عدالت محکمه (ICJ) کې د نسل‌ وژنې له قضیې سره مخ دی.