بېجینګ له افغانستان او پاکستان څخه د اوربند غوښتنه وکړه

چین له دواړو هېوادونو وغوښتل چې د چینایي وګړو، پروژو او بنسټونو امنیت خوندي کړي.

چین د جمعې په ورځ پر افغانستان او پاکستان غږ وکړ چې اوربند وکړي او ویې ویل چې د "سختې اندېښنې" وړ نښتو د پای ته رسولو لپاره له دواړو لورو سره په اړیکه کې دی.

پاکستان په سیمه کې د چین یو له نږدې شریکانو څخه دی، خو بېجینګ ځان د افغانستان "دوست ګاونډی هیواد" هم بولي. د چین د بهرنیو چارو وزارت ویاندې، "مایو نینګ" وروسته له هغه چې پاکستان د جمعې په ورځ د کابل په ګډون د افغانستان پر لویو ښارونو بمبارۍ وکړې، وویل چې چین د "کړکېچ له زیاتېدو څخه سخت اندېښمن دی."

مایو نینګ په یوه خبري ناسته کې وویل: "چین پر دواړو لورو غږ کوي چې سوله وکړي او، زغم وښيي... په نږدې وخت کې اوربند وکړي او د نورې وینې تویدنې مخه ونیسي." هغې زیاته کړه: "چین د خپلو لارو له لارې د پاکستان او افغانستان ترمنځ په شخړه کې تل منځګړیتوب کړی او چمتو دی چې د تاوتریخوالي په کمولو کې رغنده رول ولوبوي."

'څرګنده جګړه'

د پاکستان وروستي بریدونه وروسته له هغه وشول چې افغان ځواکونو د پنجشنبې په شپه د اسلام‌اباد د مخکنیو هوايي بریدونو په غبرګون کې پر پاکستاني سرحدي ځواکونو بریدونه وکړل. د پاکستان د دفاع وزیر د افغانستان سره  "څرګنده جګړه" اعلان کړه.

چین د "کمربند او لارې" نړیوالې پروژې په چوکاټ کې په پاکستان کې د ټرانسپورټ، انرژۍ او بنسټیزو پروژو لپاره په لسګونو میلیارده ډالر لګولي دي. اسلام‌اباد د تېرې مۍ میاشتې د لنډې نښتې پر مهال د هند پر وړاندې له چینايي نظامي تجهیزاتو، په ځانګړې توګه له جنګي الوتکو څخه کار اخیستی و. خو شنونکي وايي چې بېجینګ د طالبانو د سرپرست حکومت لپاره هم، چې په ۲۰۲۱ کال کې واک ته ورسېدل، یو مهم شریک ګرځېدلی دی.

ویاندې مایو د جمعې په ورځ وویل چې چین له دواړو هېوادونو غوښتي چې د چینایي وګړو، پروژو او بنسټونو امنیت خوندي کړي، وضعیت له نږدې څاري او خپلو هغو وګړو ته به مرستې ورسوي چې ورته اړتیا لري.