ایران په خلیج کې د امریکا پر مرکزونو له ۵۴۰۰ څخه ډیر د توغندیو او ډرون بریدونه کړي دي

شمیرې ښيي چې خلیجي هیوادونو د فبرورۍ له ۲۸مې راهیسې په زرګونو توغندي او بې پیلوټه الوتکې شنډې کړې دي.

د دوشنبې په ورځ د خپرو شویو رسمي ارقامو له مخې، ایران د فبرورۍ له ۲۸مې راهیسې په اوو عربي هیوادونو کې د امریکا پر پوځي اډو او ستراتیژیکو مرکزونو لږ تر لږه ۵۴۷۱ د توغندیو او ډرون بریدونه کړي دي.

په داسې حال کې چې پر ایران د امریکا او اسرائیلو بریدونه او د تهران ځوابي اقدامات دوام لري، په خلیجي هیوادونو کې ګڼ شمیر مهم ځایونه په نښه شوي دي.

د اغیزمنو هیوادونو د دفاع وزارتونو او رسمي معلوماتي مرکزونو د معلوماتو له مخې، متحده عربي امارات تر ټولو زیات اغیزمن شوی هیواد دی. د اماراتو دفاع وزارت ویلي چې د بریدونو له پیل راهیسې یې ۴۱۴ بالستیک توغندي، ۱۵ کروز توغندي او ۱۹۱۴ ډرون الوتکې شنډې کړې دي.

کویټ ویلي چې ۳۰۹ بالستیک توغندي او ۶۱۶ ډرون الوتکې یې شنډې کړې دي. د بحرین پوځ ویلي چې په یاده موده کې ۱۷۴ توغندي او ۳۹۱ ډرون الوتکې له منځه وړل شوې دي. د قطر دفاع وزارت د ۲۰۶ بالستیک توغندیو او ۹۳ ډرون بریدونو راپور ورکړی دی. د اردن پوځ ویلي چې په دې موده کې ۲۶۲ د توغندیو او ډرون بریدونه ثبت شوي دي. سعودي عربستان ویلي چې لږ تر لږه ۵۲ توغندي او ۱۰۰۶ ډرون الوتکو یې خاوره په نښه کړې ده. عمان بیا ویلي چې د ۱۹ ډرون الوتکو لخوا په نښه شوی دی.

په سیمه کې دا بې ساري کړکیچ وروسته له هغه پیل شو چې اسراییل او امریکا د فبرورۍ په ۲۸مه پر ایران بریدونه وکړل. په دغو بریدونو کې تر اوسه د ایران د مذهبي مشر آیت الله علي خامنه ای په ګډون له ۱۳۴۰ څخه ډیر کسان وژل شوي دي.

ایران په ځواب کې پر اسرائیل، اردن، عراق او هغو خلیجي هیوادونو چې د امریکا پوځي اډې پکې دي، د بې پیلوټه الوتکو او توغندیو بریدونه کړي، چې مرګ ژوبله او مالي زیانونه یې اړولي او نړیوال بازارونه او هوايي چلند یې ګډوډ کړی دی.