چین د هند لخوا پر پاکستان د اوبو د درولو نه وروسته په پاکستان کې د اوبو بند د جوړولو چارې چټکې کړې.

چین به په چټکۍ سره د پاکستان د خیبر پښتونخوا په ولایت کې د مومند بند د جوړولو چارې ګړندۍ کړي. دا خبره  د ساوت چاینا مارننګ پوسټ ورځپاڼې د دوشنبې په ورځ وکړه.

دغه بند د برېښنا تولید، د سېلابونو کنټرول، کرنې او د اوبو رسولو لپاره ډیزاین شوی دی. دا به ۸۰۰ میګاواټه (MW) هایدرو برېښنا تولید کړي او د پېښور ښار لپاره، چې د خیبر پښتونخوا مرکز دی، هره ورځ ۱.۱۴ میلیارده لیټره د څښاک اوبه برابرې کړي.

د چین دولتي انرژۍ انجینرۍ شرکت له ۲۰۱۹ کال راهیسې د مومند هایدروپاور پروژې په جوړولو بوخت دی، چې ټاکل شوې ده راتلونکی کال بشپړه شي.

د چین دولتي تلویزیون سي سي ټي وي په یوه تازه راپور کې ویلي چې د بند د کانکریټ ډکولو چارې پیل شوې دي، چې دا د دې ملي مهمې پروژې لپاره یو مهم پرمختګ او د چټک پرمختګ مرحله ګڼل کېږي.

دا څرګندونې وروسته له هغې وشوې چې هند د اپرېل په ۲۲مه د هند تر واک لاندې کشمیر په پهلګام سیمه کې د وسله والو برید وروسته، چې ۲۶ کسانو پکې ژوند د لاسه ورکړ د پاکستان سره د کلونو زوړ د سندو د اوبو تړون په یو اړخیز ډول وځنډاوه. نوی ډیلي پر اسلام‌اباد تور پورې کوي چې په دې برید کې لاس لري، خو پاکستان دا تورونه په کلکه رد کړي دي.

دواړو سیال هیوادونو ترمنځ پوځي کړکېچ د مې په ۶مه شپه هغه وخت پیل شو چې هند د پاکستان او د پاکستان تر واک لاندې کشمیر په خاوره توغندیو برید وکړ. په ځواب کې، پاکستان د مې په ۱۰مه د هند په ختیځو سیمو او د هند تر واک لاندې کشمیر کې ۲۶ پوځي اهداف په نښه کړل.

خو د امریکا په منځګړیتوب اوربند وشو، چې لا هم په ځای دی، او دواړو سیالو پوځونو پرېکړه وکړه چې د باور جوړونې اقداماتو ته دوام ورکړي څو د جګړې د چمتووالي کچه راټیټه کړي.

نوی ډیلي بیا ویلي چې کشمیر د پاکستان سره یو دوه اړخیزه موضوع ده.

خو د ۱۹۴۷ کال راهیسې د ملګرو ملتونو څو پرېکړې د کشمیر په اړه شوې دي، چې په دې لانجمنه سیمه کې د ټولپوښتنې غوښتنه کوي. تر اوسه هېڅ یوه پرېکړه نه ده عملي شوې.