یوې درې کسیزې کمېټې خپله پخوانۍ موندنه بیا تکرار کړه او د فلسطیني ماشومانو بې ساري وژنې، ټپي کېدو او هغو رواني صدمو ته یې اشاره وکړه چې پر هغوی تپل شوي دي.
د ملګرو ملتونو پلټونکو د سه شنبې په ورځ تور پورې کړ چې اسرائیل په قصدي ډول فلسطیني ماشومان په نښه کوي، چې دا په غزه کې د روانې نسل وژنې یو مهم فکتور ګرځېدلی دی.
د ملګرو ملتونو د څېړنې خپلواک نړیوال کمیسیون ویلي، دوی داسې شواهد موندلي چې "فلسطیني ماشومان په قصدي ډول د اسرائیلي امنیتي ځواکونو لخوا په نښه شوي او وژل شوي دي." د دوی په وینا، دا د "غزې د فلسطیني ډلې د ویجاړولو لپاره د اسرائیلي چارواکو او امنیتي ځواکونو د نسل وژنې اراده" ثابتولو کې یو مهم عنصر دی.
دغه درې کسیز پلټونکي ټیم، چې پخپله د ملګرو ملتونو په استازیتوب خبرې نه کوي، لومړی ځل د تېر سپټمبر په یو راپور کې ثابته کړې وه چې اسرائیلو په غزه کې نسل وژنه کړې ده. د سه شنبې ورځې په تعقیبي راپور کې راغلي چې د اسرائیلي پوځي عملیاتو پراخوالي او سیستماتیک ماهیت دوام موندلی، چې په پایله کې یې فلسطیني ماشومانو ته "بې ساري" مړینه، ټپونه او رواني صدمې رسېدلې دي. دوی ویلي چې د دې پایلې ته رسېدو لپاره "معقول دلایل" شتون لري چې اسرائیلي چارواکو او امنیتي ځواکونو په غزه کې "د نسل وژنې جرم ته دوام ورکړی دی."
په غزه کې د ماشومتوب 'له منځه وړل'
دغه کمیسیون، چې په ۲۰۲۱ کال کې د ملګرو ملتونو د بشري حقونو شورا لخوا رامنځته شوی، په خپل وروستي راپور کې هغه جرمونه څېړلي چې فلسطیني ماشومان اغېزمنوي او دا چې څنګه د اسرائیلو لخوا په غزه کې تپل شوي ژوند شرایط "د ماشومانو د مخنیوي وړ مړینې لامل ګرځي."
کمیسیون ویلي چې سخت فزیکي او رواني ټپونه، ډله ییزې رواني صدمې، یتیم توب، بېلتون، معیوبیت، پرله پسې بې ځایه کېدل، لوږه او د زده کړو او روغتیايي سیستمونو نړېدل په غزه کې "ماشومتوب له منځه وړی" او د دې سیمې ماشومان به د ټول عمر لپاره له دې اغېزو سره مخ وي.
د دې پلټنې رییس، هندي قاضي سرینیواسن مورالیدهر وویل: "د ماشومانو په نښه کولو سره، اسرائیل د فلسطیني خلکو پر هستۍ او د دوی د راتلونکي د ټاکلو پر وړتیا برید کوي. حتی د ۲۰۲۵ کال د اکتوبر د اوربند وروسته هم، د ماشومانو وژل او سخت ټپي کېدل دوام لري."
'د ویجاړولو ستراتیژي'
دا راپور د ماشومانو لپاره د ملګرو ملتونو ادارې (یونیسف) له هغه راپور څو ورځې وروسته خپریږي چې ویلي یې وو د اوربند له پلي کېدو راهیسې لږ تر لږه ۲۶۵ ماشومان وژل شوي او په سلګونو نور ټپیان شوي دي. یونیسف ویلي چې ماشومان په ډزو ویشتل شوي، بمبار شوي، د کواډکوپټرونو لخوا په نښه شوي او په خیمو، ښوونځیو او د فوټبال لوبې یا کب نیولو پر مهال وژل شوي دي.
د ملګرو ملتونو پلټونکو ویلي چې د جګړې په لومړیو دوو کلونو کې لږ تر لږه ۲۰۱۷۹ ماشومان وژل شوي او ۴۴۱۴۳ نور ټپیان شوي دي، چې دا "په غزه کې د جګړې مستقیمه پایله ده." په راپور کې راغلي چې د فلسطیني ماشومانو وژل او معیوبول "په غزه کې د فلسطیني ډلې د بیولوژیکي تسلسل او راتلونکي شتون د له منځه وړلو د یوې ستراتیژۍ برخه وه."
معیوبیت یو 'ډیموګرافیک حقیقت'
د راپور په وینا، د ماشومانو په نښه کولو سره "اسرائیل د فلسطیني ټولنې بنسټیز جوړښت له منځه وړي او د هغوی ډیموګرافیکي ځواک کمزوری کوي." اسرائیل د یتیمانو د یو "سخت بحران" رامنځته کولو مسؤل دی، او ټپي شوي ماشومان به د ټول عمر لپاره له معیوبیت سره مخ وي، چې دا اوس د غزې د ماشومانو ترمنځ یو "تعریف شوی ډیموګرافیک حقیقت" ګرځېدلی دی.
د غزې کلابندۍ "په مستقیم ډول د نوي زیږېدلو ماشومانو او د زیږون روغتیا زیانمنه کړې ده." راپور د اسرائیلو د هغو لښکرو او پوځي واحدونو لیست هم خپور کړی چې ممکن په غزه او اشغال شوې لویدیځه غاړه کې د ماشومانو د وژلو مسؤل وي.
د غزې سربیره، کمیسیون په لویدیځه غاړه کې د فلسطیني ماشومانو په وړاندې د غیرقانوني اسرائیلي میشت ځای لرونکو (کډوالو) لخوا د تاوتریخوالي د چټک زیاتوالي مستندونه هم چمتو کړي دي. کمیسیون د ملګرو ملتونو له ټولو غړو هیوادونو، په شمول د اسرائیلو، غوښتنه کړې چې د ترسره شویو جرمونو په اړه حساب ورکونه یقیني کړي.
