د تورکیې د کورنیو چارو وزارت خبر ورکړی چې د جولای د ۱۵مې نېټې د کودتا پر مهال په مارماریس کې پر ولسمشر رجب طیب اردوغان باندې د وژنې د برید (ترور) په هڅه کې د فتح الله ګولن ترهګریز سازمان غړی "بي. کې" (B.K) ونیول شو چې په پخپله يي په دغه برید کې برخه اخیستې وه.
د کورنیو چارو وزارت د اعلامیې له مخې، د پولیسو د عمومي ریاست د استخباراتو د ریاست په همغږۍ، د افیون قره حصار او د اسکی شهر ولایتونو د پولیسو د استخباراتي څانګو لخوا یو ګډ عملیات ترسره شول.
د دغو عملیاتو په پایله کې، د هغه ترهګر (B.K) ځای وموندل شو چې د جولای په ۱۵مه یې پر ولسمشر اردوغان د برید په هڅه کې برخه اخیستې وه. نوموړی چې د انټرپول لخوا په "سور نوټس" کې تر څارنې لاندې و، پخوانی جګړن او د هليکوپټر پیلوټ و چې له دندې ګوښه شوی و.
نوموړی ترهګر د افیون قره حصار ولایت د ترهګرۍ ضد پولیسو د ځانګړو ټیمونو لخوا ونیول شو. د وزارت په اعلامیه کې راغلي چې د فتح الله ګولن ترهګریز سازمان او د هغوی د جوړښتونو پر وړاندې مبارزه به په کلک هوډ سره دوام ومومي.
پدې ترڅ کې مالومه شوه چې "بي. کې" د ښار په مرکز کې د "ایناز" په نامه د زلزله ځپلو کورونو په سیمه کې د دغه سازمان په یو پټنځای کې د عملیاتو پر مهال ونیول شو او اوسمهال په پولیسو کې تر پوښتنو او څیړنو لاندې دی.
امنیتي سرچینو خبر ورکړی چې دغه ترهګر د برید له هڅې وروسته د نه نیول کېدو لپاره په دوامداره توګه خپله څېره بدلوله او له جعلي پېژندپاڼې یې ګټه اخیستله. نوموړی هغه مهال وپېژندل شو کله چې یې انځور د "څېرې پېژندنې" په سیسټم کې ثبت شو. "بي. کې" چې له څه مودې راهیسې تر څارنې لاندې و، هغه مهال ونیول شو چې له زیاتې اندازې نغدو پیسو سره یې غوښتل بهرني هیواد ته وتښتي.
