د سوریې پوځي استخباراتي چارواکو چې غازي محمد المحمد یې نیولی و، هغه ته وویل چې خپل نوم او هویت هېر کړي. دوی د هغه اسناد واخیستل او ورته یې وویل ته اوس ۳۰۰۶ نمبر بندي یې. محمد، د اسد د رژیم په زندانونو کې پنځه نیمې میاشتې تېرې کړې چېرته چې ۴۰ کیلو (۸۸ پونډه) وزن یې له لاسه ورکړ، او هره شېبه د اعدام د ګواښ لاندې و.
د مخالفو ځواکونو لخوا د اسد د وحشیانه او بې رحمه حکومت له نسکورېدو یوه اونۍ وروسته، د محمد په څېر ګڼ شمېر پخواني بندیان د سوریې د خلکو په تېرو لسیزو کې د مایوسۍ ژورو باندې رڼا اچوي. محمد، چې اوس د سوریې په شمال لوېدیځ کې د حلب نږدې سرما کې د بخارۍ مخې ته پر مندرونو تکیه وهلې یو نری سړی دی، د خپل پخواني ځان سیوری دی. ۳۹ کلن سړی قسم خوري چې په سوریه کې یې هېڅکله په سیاست کې لاس نه درلود او د خپلو وروڼو سره یې یوازې د ژوند تېرولو لپاره د یوه ساده سوداګر په توګه کار کاوه.
هغه دمشق ته د یو لنډ سوداګریز سفر په جریان کې، ونیول شو او یو ژوندی دوزخ ته وغورځول شو. محمد، چې ږیره او تور ویښتان یې لنډ پرېکړي دي وايي: "یو وخت راځي چې تاسو ټوله هیله له لاسه ورکړئ. "د پای په لور مې یوازې مړینه غوښته، د اعدام د شېبې په تمه وم. زه تقریبا خوشحاله وم، ځکه چې دا پدې معنی وه چې زما کړاو به پای ته ورسیږي."
هغه کسان چې پلازمینې ته د سفر پر مهال یې نیولي وو د "مخبرات" په نامه د بشارالاسد د حکومت د استخباراتو پلي کونکي وو. دوی هغه د خپل یوه ډاکټر ملګري سره یو ځای نیولی و، لاسونه یې شاته تړل شوي وو. محمد وايي: دا پنځه نیمې میاشتې مخکې و. هغه نه پوهېږي چې ولې ونیول شو خو فکر کوي چې دا ښايي د دې له امله وي چې دی د ادلیب ولایت څخه راغلی و، چېرته چې د مخالفو ځواکونو چټک پرمختګ په سویل لور د اسد د تېښتې لامل شو د ډسمبر په ۸مه.
محمد، چې لاسونه یې په زولنو تړل شوي او سترګې یې پټې وې، د دمشق په شتمن مزه سیمه کې یوه توقیف ځای ته بوتلل شو، چېرته چې سفارتونه، د ملګرو ملتونو دفترونه او امنیتي مرکزونه موقعیت لري. هغوی دی د ودانۍ ژورو ته بوتلو او وهل ډبول هلته پیل شول.
هغه یې د مړوندونو څخه وځړاوه.
په لومړیو څو ورځو کې، هغه د خونې په لوړه برخه کې له یوې اوسپنې میلې څخه د مړوندونو په واسطه ځړول شوی و، پښې یې ځمکې ته نه رسېدې. وروسته یې لږ ترلږه ښکته کړ چې پښې یې ځمکې ته ورسېږي. محمد وهل کېده او تقریباً هېڅ خواړه ورته نه ورکول کېدل. یوازینۍ اړیکه یې له ساتونکو سره وه.
محمد وویل، راته یې ویل چې اقرار وکړم چې ورور مې یاغیانو سره یوځای شوی دی. "رښتیا خبره دا ده چې، که څه هم زما ورور په سرما کې د یوې مرستندویه ادارې چلوونکی سوداګر دی، ما هغوی ته هغه څه وویل چې دوی یې اورېدل غوښتل."
هغه وویل چې د ښځو او ماشومانو چیغې یې اورېدلې چې د خپلو خپلوانو په وړاندې شکنجه کېدل ترڅو اقرار وکړي. شاوخوا یوه میاشت وروسته محمد پوځي استخباراتو ته وسپارل شو. هغوی هم ورته وویل چې له دې وروسته به یوازې یوه شمېره يې.
هغه په یوه تنګه خونه کې واچول شو چې شاوخوا دوه متره اوږده، د یوه سړي د قد په اندازه، او ۱.۲ متره پلنه وه. یوازینۍ رڼا د پورته برخې یوه کړکۍ وه. په خونه کې برېښنا او اوبه نه وې او هغه وايي کله به يې چې تشناب ته اړتیا لرله، ساتونکو به دی اړ کاوه چې لوڅ، په ټیټه قدم وهل او سترګې ځمکې ته نیولې تشناب ته ولاړ شي.
دوی به یې په دې خبره ملنډې وهلې چې اعدام به شي. ستا مرۍ به د پسه په څېر پرې شي. د پښو څخه ځړول کېدل غوره ګڼې؟ که په سیخ باندې ځوړندول ؟ په پای کې، محمد په دې نه پوهیده چې بهر څه پیښیږي، چې د رژیم مخالف ځواکونه د ۱۱ ورځو لپاره د شمال څخه په چټکۍ سره پرمختګ کوي ځکه چې د اسد ځواکونو خپل ټانکونه او نور تجهیزات پریښودل.
هغه وویل، "یوه شپه یې موږ له خونو څخه راوویستلو او ټول یې په دهلېز کې په قطار ودرولو، یو له بل سره یې وتړلو. دوه قطاره چې هر یو قطار ۱۴ بندیان وو. دا لومړی ځل و چې موږ یو بل ولیدل او فکر مو وکړ چې مړه کېږو. له شاوخوا یوه ساعت انتظار وروسته، بېرته په تصادفي ډول خونو ته وشړل شول.
"ما وویل چې ناروغ یم او تشناب ته اړتیا لرم، خو څوک رانغلل". بیا مو د چورلکو د کښته کېدو او پورته کېدو غږونه واورېدل، زما په فکر د چارواکو د وړلو لپاره. څو ساعته وروسته د خونو دروازې ماتې شوې او مخالفو ځواکونو دوی خوشې کړل. ما جنګیالي ولیدل چې راڅرګند شول. ما فکر وکړ چې خوب وینم.
کله چې محمد خپله کیسه کوله، د هغه ۷۵ کلنه مور یې څنګ ته کېناسته او د هغه د جاکټ سره یې لوبې کولې. یو ځل یې هم سترګې له خپل زوی څخه لرې نه کړې. هېچا هغې ته ونه ویل چې زوی یې نیول شوی دی. هغه یوازې ورک شوي. د سره صلیب نړیواله کمېټه وايي چې په سوریه کې یې له ۳۵۰۰۰ څخه زیات د ورکېدو قضیې ثبت کړي دي.
د ډېرو په خلاف، محمد نېکمرغه و. هغه بېرته راستون شو. "خو هغه بدل شوی،" د هغې مور فاطمه عبدالغني وویل. کله چې ورته ګورم، داسې لکه زما زوی چې نه وي. د هغه د انکار سره سره، هغې وویل چې بد خوبونه ویني. "هیله لرم چې عدالت ته وسپارل شي،" محمد د خپلو نیوونکو په اړه وویل. هغه ډاډه دی چې هغه کولی شي درې واړه وپیژني.
