د تورکیې د بهرنیو چارو وزیر هاکان فیدان د ملګرو ملتونو د اصلاحاتو غوښتنه کړې او په نړیوال نظم کې یې د "مشروعیت د بحران" په اړه خبرداری ورکړی
د تورکیې بهرنیو چارو وزیر پر پیاوړي څوقطبي نظام ټینګار کوي او وايي چې د غزې ناورین د نړیوال سیسټم ناکامۍ په ډاګه کوي.
د تورکیې د بهرنیو چارو وزیر هاکان فیدان خبرداری ورکړی چې د نړیوال نظم "ژور فلج" پر نړیوالو بنسټونو باور له منځه وړي او هېوادونه یو اړخیزم ته هڅوي، چې دا د "مشروعیت بحران" رامنځته کوي.
د شنبې په ورځ په استانبول کې د "ټي آر ټي ورلډ فورم" په غونډه کې فیدان وویل، نړۍ له یو قطبي نظم څخه د لېرې کېدو شاهده ده او اوس باید پرېکړه وکړي چې "پر څواړخیزم تکیه وکړي او که بېرته ورانوونکو سیالیو ته وروګرځي."
هغه د مشارکت او شمولیت پر بنسټ د یوه "پیاوړي او اصلاح شوي نړیوال سیسټم" غوښتنه وکړه او ټینګار یې وکړ چې "نن ورځ موږ له کومې ننګونې سره چې مخ یو، هغه د قوانینو نشتوالی نه، بلکې د هغوی نابرابره پلي کېدنه ده."
فیدان د نړیوالو بنسټونو، په ځانګړې توګه د ملګرو ملتونو د هراړخیزو اصلاحاتو غوښتنه وکړه او ویې ویل چې دا اداره "د خپلو بنسټیزو ژمنو په پوره کولو کې له زیاتېدونکو ستونزو سره مخ ده."
هغه وویل، تورکیه د "ملګرو ملتونو د داسې امنیت شورا غوښتونکې ده چې ډېره ډیموکراټیکه او استازیتوب کوونکې وي، او د څو محدودو کسانو د امتیاز پر ځای ډېرو ته واک ورکړي."
په غزه کې اوربند لا هم نازک دی
فیدان منځني ختیځ ته په اشارې، وویل چې "د مشروعیت له منځه تللو او د نړیوالې واکمنۍ فلج" خپله تر ټولو غمجنه بڼه په غزه کې موندلې ده.
هغه وویل، تورکیې د ولسمشر رجب طیب اردوغان د لیدلوري له مخې، د "نسل وژنې" د درولو او د عدالت د ټینګښت لپاره ډیپلوماتیکې هڅې رهبري کړې دي، چې په دې کې د غزې په اړه د اسلامي همکاریو سازمان او عرب لیګ ګډې تماس ډلې جوړول هم شامل دي.
فیدان په نیویارک او شرم الشیخ کې وروستۍ غونډې د سولې پر لور "مهم ګامونه" وبلل، خو خبرداری یې ورکړ چې د اسرائیلو د پرله پسې بریدونو له امله اوربند لا هم نازک دی.
هغه وویل، "یوه عادلانه او تلپاتې سوله یوازې د دوه دولتي حل لارې په پلي کولو او دا ډاډ ترلاسه کولو سره شونې ده چې غزه د فلسطینیانو له خوا اداره شي."
