د جمعې په ورځ، د روسیې او چین هغه هڅه چې غوښتل یې پر ایران د ملګرو ملتونو د بندیزونو بیا لګول وځنډوي، د ملګرو ملتونو په ۱۵ کسیزه امنیت شورا کې ناکامه شوه. دا وروسته له هغې وشول چې یوازې څلورو هېوادونو د دوی د پرېکړهلیک له مسودې ملاتړ وکړ، چې دې کار د بندیزونو د بیا لګولو لپاره لار پرانیسته.
پر ایران د ملګرو ملتونو ټول بندیزونه ټاکل شوې چې د شنبې په ورځ بېرته ولګول شي. دا وروسته له هغې کیږي چې اروپایي قدرتونو، چې د E3 په نوم پېژندل کیږي، یوه ۳۰ ورځنۍ پروسه پیل کړه او تهران یې د ۲۰۱۵ کال د هغې هوکړې په ماتولو تورن کړ چې موخه یې د اټومي وسلې له جوړولو څخه د ایران منع کول وو.
ایران د اټومي وسلو د ترلاسه کولو هڅې ردوي.
دیپلوماتانو ویلي وو چې د شپږو میاشتو لپاره د بندیزونو د ځنډولو د پرېکړهلیک د تصویب امکان کم و، په ځانګړي توګه وروسته له هغې چې د ایران او برېتانیا، فرانسې او جرمني ترمنځ وروستۍ خبرې د کړکېچ په ماتولو کې پاتې راغلې.
نهو هېوادونو منفي رایه ورکړه، په داسې حال کې چې دوو هېوادونو سپینه رایه وکاروله.
په ملګرو ملتونو کې د برېتانیا استازې، باربرا ووډ، له رایې ورکولو وروسته وویل: "دې شورا ته لازم ډاډ نشته چې یوې چټکې ډیپلوماتیکې حل لارې ته روښانه لاره شتون ولري."
هغې زیاته کړه: "دې شورا د سنیپ بیک (بندیزونو د بېرته لګولو) پروسې اړین ګامونه چې په ۲۲۳۱ پرېکړهلیک کې ذکر شوي، پوره کړل، له همدې امله د ایران د اټومي پراختیا ضد د ملګرو ملتونو بندیزونه به د دې اونۍ په پای کې بیا ولګول شي."
اروپایي قدرتونو وړاندیز کړی و چې د بندیزونو بیا لګول به تر شپږو میاشتو پورې وځنډوي، ترڅو د یوې اوږد مهاله هوکړې په اړه د خبرو لپاره زمینه برابره شي، خو په دې شرط چې ایران د ملګرو ملتونو اټومي څارونکو ته بیا لاسرسی ورکړي، د خپلو غني شویو یورانیمو د زېرمو په اړه اندېښنو ته ځواب ووايي، او له متحده ایالاتو سره خبرو اترو ته کېني.
