د کډوالو نړیوال سازمان (IOM) ویلي چې د ملګرو ملتونو د بشري چارو د همغږۍ دفترد معلوماتو له مخې، په غزه کې له ۹۰ سلنې څخه زیات کورونه ویجاړ شوي یا زیانمن شوي دي. یاد شوي سازمان خبرداری ورکړی چې د اسرائیلو روانه جګړه د دې سیمې خلک یو لا ستر بشري ناورین پر لور بیايي.
دغه ادارې د چهارشنبې په ورځ په ایکس (پخوانی ټویټر) کې لیکلي: "کله چې د خوندي ځایونو هیڅ امکان نه وي، کورنۍ په ناامنه کنډوالو کې پناه اخلي." دوی ټینګار کړی: د کدوالو نړۍوال سازمان د سرپناه مرستې چمتو کړې دي خو له بده مرغه چې د ننوتو لارې بندې دي. سیمې ته د مرستو د ننوتلو لارې باید اوس پرانیستل شي."
د مارچ د دویمې نېټې راهیسې، اسرائیلو د غزې پر مخ ټولې لارې تړلې دي، او حتا د اړینو توکو ننوتلو ته هم اجازه نه ورکوي. اسرائیل ددې سره سره چې په جګړه ځپلې سیمه کې د قحطۍ په اړه ګڼ راپورونه خپاره شوي دي خو بیا هم بندیزونو ته دوام ورکوي.
د اسرائیلو پوځ د مارچ په ۱۸مه نېټه په یو اړخیز ډول په غزه کې خپله وژونکې جګړه بیا پیل کړه، او د جنورۍ په ۱۹مه د اوربند او د بندیانو د تبادلې تړون یې مات کړ.
تر اوسه پورې په غزې د اسرائیلو په روانو بریدونو کې له ۵۱,۳۰۰ څخه زیات فلسطینیان، چې ډېری یې ښځې او ماشومان دي، وژل شوي دي. دغه شمېر وروسته د ۶۲,۰۰۰ تنو ته لوړ شو.
تل ابیب د دې سیمې ډېری برخې په کنډوالو بدلې کړي او د محاصره شوې سیمې نږدې ټول خلک یې بې ځایه کړي دي.
تېر نوامبر میاشت کې د نړیوالې جزا محکمې د اسرائیلو د لومړي وزیر نتنیاهو او د هغه د پخواني دفاع وزیر، یوآف ګالانت، لپاره د غزې په اړه د جنګي جرمونو او د بشریت پر وړاندې د جرمونو په تور د نیولو امرونه صادر کړل.
اسرائیل د غزې پر وړاندې د جګړې په اړه د نړیوالې محکمې د نسل وژنې قضیې سره هم مخ دی.
