ایران خبرداری ورکړی  که چیرې بندرونه محاصره شي د خلیج بندرونه به هم 'خوندي پاتې نه شي'

هغه جګړه، چې اوومې اوونۍ ته ننوځي، زرګونه کسان یې وژلي او نړیوال بازارونه یې لړزولي دي.

د ایران دوو نیمه رسمي خبري اژانسونو راپور ورکړی چې د ایران انقلابي ګارد  ویلي د هرمز تنګی د ایران تر “بشپړ کنټرول” لاندې دی او د غیر پوځي کښتیو لپاره خلاص دی، خو پوځي کښتۍ به له “سخت غبرګون” سره مخ شي.

دا ګواښ وروسته له هغه وشو چې واشنګټن وویل چې د دوشنبې په ورځ له ۲ بجو څخه به د ایران پر بندرونو سمندري محاصره عملي کړي.

سره له دې چې د امریکا او ایران د اوږدو خبرو اترو وروسته اوربند رامنځته شوی و، کړکېچ لا هم روان دی او خبرې بې پایلې پاتې شوې، چې د شخړې لپاره یې لاره هواره کړه.

د ایران د پارلمان رییس، محمد باقر قالیباف، چې په خبرو اترو کې یې د ایران د لوري مشري کوله، ایران ته د بیرته راستنیدو په یوه بیان کې ټرمپ ته په خطاب کې وویل: "که تاسو جګړه کوئ، موږ به هم جګړه وکړو."

جګړه، چې اوومې اوونۍ ته ننوځي، زرګونه کسان یې وژلي او نړیوال بازارونه یې سخت اغېزمن کړي دي.

ایران د خلیج او د عمان سمندري بندرونه هم ګواښلي، وروسته له هغې چې امریکا د ایران پر بندرونو او ساحلونو محاصره اعلان کړه.

د سپاه پاسداران انقلابي ګارډ په وینا چې د دولتي ټلویزیون له لارې خپره شوې، ویلي چې د خلیج او د عمان سمندر د بندرونو امنیت “یا د ټولو لپاره دی او یا د هېچا لپاره نه دی.”

د ایران وسله ‌والو ځواکونو ویلي چې د هېواد د قانوني حقونو دفاع خپله طبیعي او قانوني دنده ګڼي، او له همدې امله د ایران د ځمکنیو اوبو پر سر حاکمیت د ایراني ملت طبیعي حق دی.

په بیان کې ویل شوي چې “د دښمن اړوند کښتۍ” به د هرمز تنګي له تېرېدو منع شي، خو نورې کښتۍ به د تهران د مقرراتو له مخې تګ راتګ کولی شي.

سپاه پاسداران انقلاب اسلامي د “دوامداره دښمن ګواښونو” په یادولو سره ویلي چې ایران به د جګړې وروسته هم د هرمز تنګي د کنټرول لپاره یو دایمي میکانیزم په کلکه پلي کړي.

هغوی زیاته کړې چې د متحده ایالاتو هغه محدودیتونه چې په نړیوالو اوبو کې د سمندري تګ راتګ پر وړاندې لګول شوي “غیرقانوني او د سمندري غلا په معنا دي.”