اردوغان په ډاګه کړه چې ۱۰۷ کاله مخکې (له ۱۹۱۹ کال څخه د تورکیې د خپلواکۍ د جګړې له لومړني ګام) له سامسون ښار څخه پیل شوی د استقلال مزل، نن ورځ د یوه لوی او پیاوړي تورکیې په  لوري روان دی. هغه زیاته کړه: «له موږ سره سمدستي شاته، له استقلال څخه تر استقلال پورې د غزېدلې لارې دوه پیاوړې نښې حضور لري؛ یو خوا د باندرمه (Bandırma) بېړۍ او تر څنګ یې د TCG Anadolu جګړه ییزه بېړۍ ده. دا لاره چې له باندرمه بېړۍ پیل او تر TCG Anadolu دوام مومي، د دې ثبوت دی چې تورکیه له کومه ځایه کوم ځای ته رسېدلې ده. د څښتن تعالی شکر دی چې موږ تر نن ورځې پورې په توپانی سمندرونو کې تورکیې ته د نجات او سلامتیا ساحل موندلی دی. زموږ په شاوخوا سیمه کې د روانو ناخوالو پر مهال، موږ خپل هېواد ته په ډېرو برخو کې تاریخي بریاوې او لاسته راوړنې په برخه کړې.»

د «د ترهګرۍ نه د پاکې تورکیې» بهیر په اړه د یوه زده کوونکي د پوښتنې په ځواب کې، اردوغان وویل: «په ختیځې او سویل ختیځې اناتولیا کې له ترهګرۍ څخه راپیدا شوې ستونزې خورا لویه وې، خورا سترې ننګونې مو لیدلې، خو د خدای په فضل او مهربانۍ، اوسمهال په سویل ختیځې او ختیځې اناتولیا سیمو کې د ترهګرۍ په نوم هېڅ څه نه دي پاتې.»

نوموړي په یادو سیمو کې د ډاډمن چاپیریال ډاډ ورکړ او ټینګار یې وکړ چې اصلي موخه یې ټولې ختیځې او سویل ختیځې اناتولیا ته د تلپاتې سړې سينې او ډاډمنې فضا راوستل دي.