چین : د امریکا د تعرفو لوبې ته به نور د ذرې په اندازه اهمیت ورنکړي

د چین د بهرنیو چارو وزارت ویلي چې که متحده ایالات د "ګمرکي شمېرو لوبې " ته دوام ورکړي، چین به ورته هېڅ پام ونه کړي. دا څرګندونې وروسته له هغې وشوې چې سپینې ماڼۍ وویل، د چین ځینې اقداماتو له امله پر دې هېواد تر ۲۴۵ سلنه پورې ګمرکي مالیات لګول شوي دي.

د بیجینګ څرګندونې د پنجشنبې په ورځ وروسته له هغې مخې ته راغلې چې سپینې ماڼۍ د سه شنبې په ورځ په یوه معلوماتي پاڼه کې وویل، د چین ټولیز ګمرکي مالیات د ۱۲۵ سلنه وروستي متقابل ګمرک، د فینټانیل کړکېچ د حل لپاره ۲۰ سلنه ګمرک، او د ناعادلانه سوداګریزو کړنو د حل لپاره د ۷.۵ سلنه څخه تر ۱۰۰ سلنه پورې ګمرکي مالیات شامل دي.

د همدې ورځې په لومړیو کې، چین له متحده ایالاتو وغوښتل چې د "اعظمي فشار" تګلاره او په سوداګریزو خبرو کې "بلیک میل" یا (غلطه ګټه اخيستل) بند کړي.

دا څرګندونې د ولسمشر ډونالډ ټرمپ د چهارشنبې د ورځې د خبرو په ځواب کې وشوې، چېرې چې هغه وویل د سوداګریزې جګړې په اړه پرېکړه د چین په لاس کې ده.

ټرمپ وویل: "چین باید له موږ سره معامله وکړي. موږ اړتیا نه لرو چې له دوی سره معامله وکړو."

د سوداګرۍ کړکېچ

ټرمپ دوه اونۍ مخکې په ټولو هېوادونو اضافي ګمرکي مالیات اعلان کړل، خو بیا یې په ناڅاپي ډول د ګڼو هېوادونو لپاره لوړ "متقابل ګمرکونه" کم کړل، په داسې حال کې چې پر چین یې سخت مالیات پر ځای پرېښودل.

بیجینګ د دې په ځواب کې د امریکایي توکو پر وړاندې خپل ګمرکي مالیات لوړ کړل او ویلي یې دي چې خبرې اترې یوازې د متقابل درناوي او برابري پر بنسټ کېدای شي. په همدې حال کې، ګڼ شمېر نور هېوادونه د واشنګټن سره د دوه اړخیزو تړونونو په اړه غور کوي.

تېره اونۍ، چین د نړیوال سوداګرۍ سازمان ته نوې شکایت وړاندې کړ او د امریکا د ګمرکي مالیاتو په اړه یې "جدي اندېښنه" څرګنده کړه، او واشنګټن یې د نړیوال سوداګریز سازمان د اصولو په ماتولو تورن کړ.

چین په دې اونۍ کې په ناڅاپي ډول یو نوی سوداګریز مذاکره کوونکی وټاکه چې د ګمرکي جګړې د حل په خبرو کې به مهم رول ولوبوي، او د سوداګرۍ د چارو مشر وانګ شووین یې د نړیوال سوداګریز سازمان لپاره خپل استازی لي چینګ ګانګ سره بدل کړ.

واشنګټن ویلي چې ټرمپ له چین سره د سوداګریز تړون کولو ته چمتو دی، خو بیجینګ باید لومړی ګام پورته کړي، او ټینګار یې کړی چې چین زموږ پیسو ته اړتیا لري.