د روسیې ولسمشر ولادیمیر پوتین ویلي چې فکر کوي د اوکراین جګړه پای ته رسېږي.
پوتین د شنبې په ورځ خبریالانو ته د اوکراین د جګړې په اړه وویل: "زه فکر کوم چې دا موضوع پای ته رسېږي."
هغه دا هم وویل چې چمتو دی له خپل اوکرایني سیال، ولادیمیر زیلینسکي سره وویني، خو یوازې د سولې د تړون د وروستي کولو لپاره.
پوتین وویل: "په درېیم هېواد کې لیدنه ممکنه ده، خو یوازې په هغه صورت کې چې د سولې پر تړون وروستۍ هوکړې شوې وي." هغه استدلال وکړ چې دا ډول تړون باید "د اوږدمهاله تاریخي لیدلوري لپاره جوړ شوی وي."
فایننشل ټایمز د پنجشنبې په ورځ راپور ورکړی و چې د اروپايي ټولنې مشران د احتمالي خبرو لپاره چمتووالی نیسي.
کله چې ترې وپوښتل شول چې ایا له اروپایانو سره خبرو ته لېواله دی، هغه وویل چې د ده لپاره غوره شخصیت د جرمني پخوانی لومړی وزیر ګیرارډ شروډر دی.
'عادلانه ځواب'
پوتین زیاته کړه چې روسیې اوکراین ته د ۵۰۰ بندیانو پر وړاندې د ۵۰۰ نورو د تبادلې وړاندیز کړی و، مخکې له دې چې د امریکا ولسمشر ډونالډ ټرمپ د اوربند او د ۱۰۰۰ بندیانو پر وړاندې د ۱۰۰۰ نورو د تبادلې نوښت وکړي.
هغه د ټرمپ نوښت یو "عادلانه وړاندیز" وباله، خو دا یې هم وویل چې روسي لوري تر اوسه د تبادلې لپاره کوم وړاندیز نه دی ترلاسه کړی.
کرملین تېره اونۍ ویلي وو چې دا د اروپايي حکومتونو کار دی چې لومړی ګام پورته کړي، ځکه هغوی وو چې په ۲۰۲۲ کال کې په اوکراین کې د جګړې له پیل وروسته یې له مسکو سره اړیکې پرې کړې.
په اوکراین کې جګړې د ۱۹۶۲ کال د کیوبا د توغندیو له بحران راهیسې د روسیې او لوېدیځ ترمنځ په اړیکو کې تر ټولو جدي کړکېچ رامنځته کړ، کله چې ډېری خلک وېرېدل چې نړۍ د اټومي جګړې په درشل کې ده.
