د اکسیوس (Axios) د راپور له مخې، د ټرمپ ځانګړی استازی سټیو ویټکوف او د ایران لوړپوړی ډیپلومات عباس عراقچي د یوه احتمالي اټومي تړون په اړه د خبرو اترو د لومړي پړاو لپاره سویس ته سفر کوي.
اکسیوس راپور ورکړی چې امریکایی استازی سټیو ویټکوف او د ایران د بهرنیو چارو وزیر عباس عراقچي دواړه د خبرو اترو لپاره سویس ته روان شوي دي. دا په داسې حال کې ده چې په لبنان کې اوربند د ایران د جګړې یو لنډمهاله تړون په یو پایداره سیمه ییز تړون د بدلولو هڅې بیا راژوندۍ کړې دي.

اسرائیل او حزب الله د جمعې په ورځ په لبنان کې پر اوربند هوکړه وکړه. دا هوکړه وروسته له هغه وشوه چې د جګړې زیاتوالي د امریکا او ایران ترمنځ په هغو خبرو اترو شکونه پیدا کړي وو چې د هرمز تنګي د بیا پرانستلو او د تېلو د اکمالاتو د ثبات لپاره حیاتي دي.

دا پرمختګ له هغه ۱۴ ماده ییز یادښت وروسته وشول چې دواړو لورو پدې اونۍ کې د جګړې د درولو او د ایران د اټومي پروګرام په اړه د شخړو د هوارولو او همدارنګه د یوې دوامدارې هوکړې لپاره د نورو حساسو مسایلو د حل لپاره د ۶۰ ورځو فرصت برابرولو په موخه لاسلیک کړ.

په هرصورت، د امریکا د ولسمشر مرستیال جې ډي وانس (JD Vance) د پنجشنبې په ورځ د اسرائیل او حزب الله ترمنځ په لبنان کې د کړکېچ له امله سویس ته د سفر پلان لغوه کړ.

د اوربند په پلي کېدو سره، ویټکوف سویس ته ځي ترڅو له جیرډ کوشنر (د ولسمشر ټرمپ زوم) سره یوځای شي، چې دمخه هلته دی. اکسیوس زیاته کړه چې عراقچي پلان لري د شنبې په ورځ هلته سفر وکړي.

دا پرمختګ ښایي دا نښه وي چې دواړه لوري نیت لري تخنیکي خبرې اترې پیل کړي چې موخه یې د یو دایمي اوربند خوندي کول دي. سپینې ماڼۍ د ویټکوف د سفر په اړه پوښتنو ته ځواب نه دی ویلی.

یوه لوړپوړي امریکايي چارواکي وویل چې په لبنان کې اوربند د جمعې په ورځ مازدیګر شاوخوا ۴ بجې (عملي شو. هغه زیاته کړه چې د امریکا او قطر مذاکره کوونکو د ایران په مرسته دا هوکړه برابره کړې ده.

د حزب الله دوو سرچینو او یوه لوړپوړي اسرائیلي چارواکي رویټرز خبري اژانس ته د اوربند پخلی کړی دی.

اسرائیلي چارواکي وویل: "که حزب الله پر موږ برید ونه کړي، نو زموږ لپاره دا د جګړې وخت نه دی." هغه زیاته کړه چې اسرائیل به خپل ځواکونه په سویلي لبنان کې وساتي، چیرته چې دوی د خپلې شمالي پولې په اوږدو کې یوه سیمه نیولې ده.

د لبنان روغتیا وزارت ویلي چې له نیمې شپې راهیسې د جمعې تر ورځې پورې د اسرائیلو په بریدونو کې ۴۷ کسان وژل شوي او ۹۷ نور ټپیان شوي دي. بلخوا اسرائیلي پوځ ویلي چې په لبنان کې په یوه پیښه کې څلور سرتیري وژل شوي، خو نور جزیات یې نه دي ورکړي.

پر لبنان د اسرائیل بریدونه ممکن پر خبرو اترو منفي اغیز وکړي، ځکه چې هلته د جګړې پای ته رسول د امریکا او ایران د پراخې هوکړې لپاره یو شرط دی.

عراقچي د جمعې په ورځ له خپل پاکستاني سیال سره په ټیلیفوني خبرو کې وویل چې متحده ایالات به د خپلو ژمنو د هر ډول سرغړونې مسؤل وي، په شمول په لبنان کې د جګړې پای ته رسول.