د نړۍ د خوراکي پروګرام (WFP) چې له وړاندې د روان کال لپاره د ۴۰ سلنه بودیجې کمښت سره مخ دی، د دوشنبې په ورځ وویل چې دوی ته د امریکا لخوا د دې ۱۴ هېوادونو لپاره د مرستو بندیدو خبر ورکړل شوی دی.
نوموړې ادارې د ټولنیزې مډیا له لارې په خپور کړي بیان کې ، د دغو هېوادونو نومونه نه دي یاد کړي.
ادارې ویلي: "که دا پرېکړه عملي شي، نو دا به د هغو میلیونونو خلکو لپاره د مرګ سزا په معنا وي چې له سختې لوږې او قحطۍ سره مخ دي."
د نړۍ د خوراکي پروګرام ویلي چې دوی اوس مهال له واشنګټن سره په خبرو بوخت دي ترڅو د دې پرېکړې وضاحت ترلاسه کړي او د ژوند ژغورونکو عملیاتو لپاره د مرستو دوام غوښتنه وکړي.
یادې شوې ادارې د امریکا ددې پریکړې د احتمالي اغېزو په اړه د اندېښنې څرګندولو ترڅنګ، د امریکا او نورو مرسته کوونکو هېوادونو د ملاتړ څخه مننه هم کړې ده.
ادارې زیاته کړې: "زموږ کارکوونکي په ټوله نړۍ کې د لوږې له ګواښ سره مخامخ ټولنو ته د اړینو خوراکي مرستو رسولو لپاره بې ساري هڅې کوي."
د مرستو د کمښت زیاتوالی
د نړۍ د خوراکي پروګرام یوازینۍ اداره نه ده چې د امریکا د مرستو کمښت سره مخ ده. د ډونلډ ټرمپ د ولسمشرۍ پر مهال، امریکا د انزوا پالنې تګلارې په چوکاټ کې د نورو هېوادونو سره د مرستو هڅې بندې کړې.
د ټرمپ ادارې د ملګرو ملتونو د نفوس صندوق ته، چې د تولیدي روغتیا د ودې لپاره کار کوي، ویلي چې دوی دوه پروګرامونه پای ته رسوي. د دې پروګرامونو څخه یو د افغانستان لپاره و او بل د سوریې لپاره.
د امریکا سربېره، په وروستیو میاشتو کې نورو هېوادونو هم د مرستو کمښت اعلان کړی، چې د غیر دولتي سازمانونو او نړیوالو ادارو ترمنځ اندېښنې راپورته کړې دي.
د ټرمپ ادارې د امریکا د نړیوالې پرمختیا اداره (USAID)، چې د امریکا د بشري مرستو اصلي اداره ده، په پراخه کچه کمزورې کړې ده. دې ادارې مخکې کلنۍ بودیجه ۴۲.۸ میلیارده ډالره درلوده، چې دا د نړۍ په کچه د ټولو مرستو ۴۲ سلنه برخه جوړوله.
