کرملین: د ټرمپ سخت دریځ د امریکا او روسیې ترمنځ د خبرو پای ته رسېدو معنا نه لري.

د کرملین ویاند ديميتري پېسکوف وايي چې له امریکا سره د اړیکو د ښه والي لپاره لا هم ډېر "خنډونه" او ستونزې شته، او زیاتوي چې دا اړیکې "په یوه خواشینوونکي حالت کې" دي.

کرملین ویلي دي چې دوی باور نه لري چې د اوکراین په جګړه کې د روسیې په وړاندې د امریکا د ولسمشر ډونالډ ټرمپ سخت دریځ د امریکا او روسیې د خبرو اترو د پای ته رسیدو معنی ولري چې موخه یې د دوی خرابې اړیکې بیا راژوندۍ کول دي.

ټرمپ د دوشنبې په ورځ خپل نوی دریځ اعلان کړ، چې له مخې یې مسکو ته ۵۰ ورځې مهلت ورکړل شوی څو په اوکراین کې اوربند ته ورسېږي، که نه، نو له بندیزونو سره به مخ شي. هغه همداراز د کیف لپاره د لا ډېرو توغندیو ژمنه وکړه، چې د روسیې د بهرنیو چارو وزارت د پنجشنبې په ورځ په کلکه وغندله.

کله چې د جمعې په ورځ له کرملین ویاند دیمیتري پېسکوف وپوښتل شول چې آیا د ټرمپ دغه څرګندونې د مسکو-واشنګټن ترمنځ د اړیکو د بیا پیل هڅو د پای ته رسېدو معنا لري، هغه وویل:

" موږ فکر کوو چې دا هغه څه ندي چې معنی یې لري. البته، دا دوه جلا مسئلې دي. یوه موضوع د اوکراین د (سولې) د هواري موضوع ده، بله موضوع زموږ دوه اړخیزې اړیکې دي."

د جنوري په میاشت کې د ټرمپ د بیا واک ترلاسه کولو وروسته د واشنګټن سره د مسکو خبرې اترې ښي شوې وې. خو ټرمپ ورځ تر بلې له ولسمشر ولادیمیر پوتین څخه ډېر ناهیلی شوی، ځکه چې کرملین د احتمالي اوربند لپاره ځینې سخت شرایط وړاندې کړي دي.

روسیې او اوکراین سږکال په تورکیه کې دوه ځله د سولې خبرې وکړې، چې له امله یې د بندیانو او د وژل شوو سرتېرو د جسدونو تبادلې پرېکړې وشوې.

خو تر اوسه د درېیم پړاو خبرو لپاره کومه نېټه نه ده ټاکل شوې، او دواړه ښکېلې خواوې لا هم د اوربند یا د احتمالي سولې د هوکړې پر شرایطو ډېر واټن لري.