روسیې د سه شنبې په ورځ وویل چې تېره شپه یې په ټول هېواد کې ۴۱۹ اوکرایني ډرون الوتکې راغورځولي دي، چې په دې کې د مسکو سیمه هم شامله ده؛ هلته چارواکو تایید کړې چې یو شپږ میاشتنی ماشوم وژل شوی دی.
کیف په وروستیو میاشتو کې د روسیې په خاوره کې د لیرې واټن ډرون بریدونو لړۍ چټکه کړې ده، دا په داسې حال کې ده چې پر اوکراین د مسکو پراخ یرغل نږدې څلور نیم کلونو ته غځېدلی دی.
کیف په ځانګړي ډول د روسیې د انرژۍ تاسیسات په نښه کوي ترڅو د کرملین د عوایدو هغه حیاتي سرچینه زیانمنه کړي چې د جګړې د لګښتونو لپاره ترې ګټه اخلي.
د روسیې دفاع وزارت په خپله رسمي پاڼه کې لیکلي چې د هوايي دفاع سیسټمونو په ټول هېواد کې "د ۴۱۹ اوکرایني ثابت وزر لرونکو بې پیلوټه الوتکو مخه نیولې او له منځه یې وړي دي."
د مسکو سیمې والي، اندري ووروبیوف وروسته وویل چې ډرون الوتکو د مسکو په سویل لویدیځ کې د "یګوریفسک" (Yevgoryevsk) په کلي کې پر یوه "شخصي کور" برید کړی دی. هغه پر ټیلیګرام ولیکل: "له بده مرغه، یو شپږ میاشتنی ماشوم روغتون ته پر لاره ساه ورکړه." نوموړي زیاته کړه چې دوه لویان او یو بل ماشوم په روغتون کې بستر شوي دي.
د مسکو ښاروال سرګي سوبیانین مخکې ویلي وو چې هوايي دفاع د دوشنبې له ماښام راهیسې ۶۱ "دښمن ډرون" چې پلازمینه یې په نښه کړې وه، راغورځولي دي.
د ډرون الوتکو دا برید څو ورځې وروسته له هغه کیږي چې روسیې د تېرې پنجشنبې او جمعې ترمنځ ۶۶۰ اوکرایني ډرون الوتکې راغورځولې وې، چې دا د جګړې له پیل راهیسې یو له تر ټولو لوړو شمېرو څخه وه. د اوکراین یو برید تېره اونۍ د مسکو په سویل ختیځ کې د تیلو په یوه چاڼځای کې د اور لګېدو لامل هم شوی و.
