«موږ د دغو بریدونو د سمدستي بندولو غوښتنه تکراروو چې سیمه ییز ثبات او امنیت هم تهدیدوي.»
د تورکیې د بهرنیو چارو وزارت د حوثیانو له خوا د مکې مکرمې پر ښار د بې پیلوټه الوتکې (ډرون) برید هڅه وغندله.
دغه وزارت د حوثیانو لخوا د مکې مکرمې د په نښه کولو د هڅې په اړه په یوه لیکلې بیان کې وویل: «موږ د حوثیانو هغه ډرون برید په کلکه غندو چې د مکې مکرمې سپیڅلی ښار یې په نښه کاوه.»
په بیان کې د سعودي عربستان د حاکمیت، ځمکنۍ بشپړتیا او امنیت نه د تورکیې ملاتړ تایید کړی او له سعودي عربستان سره پیوستون او همبستګي یو ځل بیا روښانه شوې ده.
په بیان کې زیاته شوې: «موږ خپله دا غوښتنه تکراروو ، دا ډول بریدونه چې سیمه ییز ثبات او امنیت هم ګواښي باید سمدستي پای ته ورسېږي او له هر هغه عمل څخه ډډه وشي چې تاوتریخوالی نور هم زیاتوي.»
د سعودي په مشرۍ د عربي ائتلاف ویاند جنرال تركي المالکي پرون وویل چې د سعودي عربستان سلطنتي هوایي دفاع ځواکونو د حوثیانو لخوا راتوغول شوی یو ډرون مخکې له دې چې د مکې مکرمې منع شوي هوایي حریم ته ننوځي، کشف او د ښار په سویل کې شنډ او له منځه یوړه.
بل خوا، د حوثیانو پوځي ویاند یحیی سریع ادعا وکړه چې پر مکې مکرمې د برید ادعاوې حقیقت نلري.
سریع وویل چې پر سعودي عربستان بریدونو کې یوازې د تېلو تاسیسات او پوځي اډې نښه کېږي او زیاته یې کړه چې دوې له مقدسو ځایونو څخه په بشپړه توګه لرې او محتاطه تګلاره تعقیبوي.
