په پاکستان کې په بېلابېلو بریدونو کې لږ تر لږه ۷ پولیس وژل شوي
پاکستاني چارواکي وايي، د سې شنبې په ورځ په پاکستان کې په جلا جلا بریدونو کې لږ تر لږه اوه پولیس وژل شوي، چې دوه یې د پنجاب ایالت په یوه امنیتي پوسته کې په ځانمرګي برید کې وژل شوي دي.
د پنجاب د پولیسو مشر عبدالکریم په یوه بیان کې ویلي، ځانمرګی برید د بھکر ولسوالۍ په یوه پوسته کې شوی دی. پولیس وايي، په دغه برید کې د پولیو ضد ټیم د دوو روغتیايي کارکوونکو په ګډون درې ملکي وګړي هم ټپیان شوي دي.
تر دې مخکې د سه شنبې په ورځ د کورنیو چارو وزیر محسن نقوي په یوه بیان کې ویلي و، چې وسله والو د خیبر پښتونخوا ایالت په کوهاټ سیمه کې د پولیسو پر یوه موټر برید کړی دی. هغه ویلي، په دغه برید کې د یوه لوړپوړي افسر په ګډون لږ تر لږه پنځه پولیس او دوه ملکي وګړي وژل شوي دي. د کوهاټ د ولسوالۍ د پولیسو افسر شهباز الهي په یوه بیان کې ویلي، چې په دغه برید کې درې نور کسان ټپیان شوي دي.
په تېره یوه اوونۍ کې، د خیبر پښتونخوا او بلوچستان په ایالتونو کې له وسله والو سره په نښتو او امنیتي عملیاتو کې د یوه لوړپوړي پوځي افسر په ګډون لږ تر لږه ۱۶ امنیتي سرتېري وژل شوي دي. د پوځ په وینا، په دغو عملیاتو او بریدونو کې ۵۳ وسله وال هم وژل شوي دي.
په وروستیو کلونو کې، پاکستان د ترهګرۍ له زیاتوالي سره مخ دی، چې په خیبر پښتونخوا او بلوچستان کې امنیتي ځواکونه، د قانون پلي کوونکي او دولتي تاسیسات په نښه کیږي.
اسلام اباد پر کابل تور لګوي چې په پاکستان کې د بریدونو ملاتړ کوي، خو کابل دا تور ردوي. د دواړو هېوادونو ترمنځ سرحدي نښتې له یکشنبې راهیسې وروسته له هغې پیل شوې، چې پاکستان وویل په افغانستان کې یې د "ترهګرو اووه کمپونه او پټنځایونه" په نښه کړي دي. خو د طالبانو اداره وايي، په دغو بریدونو کې ملکي وګړي وژل شوي دي.
